November ni 1, Ningani zan Mc Dowell's No 1 Soda Mizoram Premier League (MPL) Season 7 Round 11 match hmasa ber Mizoram Police FC leh Ramhlun North FC inkhelah Ramhlun North FC chuan 2-1 in Mizoram Police FC an hneh. He inkhelah hian Ramhlun North FC goalkeeper Eddie Zorammawia chu Man of the match-ah thlan a ni.

Team pahnih te hi round 4-ah inhmachhawn tawhin Mizoram Police FC hian 5-1 in anhneh a, an intawn vawihnihnaah erawh Ramhlun North FC an chungnung zawk a ni. Ramhlun North FC hian point 9 neiin pasarihna an ni mek a, relegate an hlat sawt hle. Mizoram Police FC hian point 15 neiin a sang pali zingah awm mahse semifinal khel turin an dinhmun a him lo.

Mizoram Police FC 1-2 Ramhlun North FC

(Lalramtharmawia 45+1') (Lalremruata 7', Lalliansanga 64')

MoM: Eddie Zorammawia, Ramhlun North FC

Goal lut te hi first half leh second half-a lut an ni a, first half-ah Ramhlun North FC tan winger Lalremruata chuan goal hmahruai a khung chu Mizoram Police FC tan Lalramtharmawia chuan an siphurh a rul a, Second half-ah Ramhlun North FC tan forward Lalliansanga chuan an chakna goal a khung.

Goal hmasa ber hi minute 7-ah a lut a, Ramhlun North FC tan Lalmawizuala ball vawrh luh tha zet chu box chhunga awm Lalremruata chuan chiang zetin a khung. Ramhlun North FC chuan nawr chhunzawmin goal thun belhna hun tha an nei a, Lalliansanga chuan Mizoram Police FC keeper Muanawma chiah a hmachhawn hnuah Muanawma chuan a dan sak.

Mizoram Police FC chuan nawr letin Sawmfela leh F. Lalrinpuia (Valpuia) chuan Ramhlun North FC keeper Eddie Zorammawia tan hna hautak an siam lo a, box chhung chiah a tang a Sawmfela shot tha zet chu Ramhlun North FC keeper Eddie-a chuan a dan sak hnuah R. Malsawmtluanga (Msa) corner pet tha zet chu Lalhmunmawia chuan hnai tak atangin goal ban a tauh per bawk.

Goal luh belh lo in chawlh lawk an hmang dawn emaw tih hnu huntawp dawn injury time-ah Mizoram Police FC chuan an hun tha neih hmang tangkaiin free kick atangin Lalramtharmawia chuan mawi takin an siphurh sutna goal a khung a, 1-1 a inhneh tawkin hun chanve an hmang zo ta a ni.

Second half tan a ni a, Mizoram Police FC chuan nawr nghalin goal thun belhna hun tha an nei a, box chhungah Sawmfela ball pek tha zet chu bench a tang a lut Lalbiakhlua (Biaktea) chuan Ramhlun North FC keeper Eddie-a chiah a hmachhawn hnuah Eddie-a chuan a dan sak a, box pawn chiah a tang a Sawmfela shot tha zet chu a goal dawn nia a lan laiin goal sirah chiah a kal.

Ramhlun North FC chuan minute 64-ah an hun tha neih hmang tangkaiin box pawn a tang a Lalliansanga ball vawrh luh chu Mizoram Police FC Keeper Muanawma chuan man tumin zuan mahse, ball chuan sawh khum chiahin a goal a, Ramhlun North FC chuan 2-1 in hmaanhruai.

Mizoram Police FC chuan an siphurh sut ngei tumin counter attack-in an nawr a, minute 72-ah R. Malsawmtluanga free kick tha zet chu Ramhlun North FC defender Melory Laldinsanga chuan lo khawih fuhin penalty a chawi a, he penalty hi Sawmfela chuan petin Ramhlun North FC keeper Eddie-a chuan a dan sak.

Huntawp dawnah Police chuan an siphurh sutna hun tha neiin Sawmfela shot tha zet chu Ramhlun North FC keeper Eddie-a chuan a dan sak a, Ramhlun North FC chuan 2-1 in hnehna an chang zui ta a ni.

(adsbygoogle = window.adsbygoogle || []).push({});