16 Nov 2019 10:14

inkhel

Ramhlun North FC-in Electric Veng FC an chelh

Mizoram Premier League (MPL) Season 8 khelh mekah November ni 16, Inrinni tlai round 12 match thumna Ramhlun North leh Electric Veng FC Inkhelah goal lut awmlo in an inhneh tawk a, point 1 ve ve an hlawh chhuak. He inkhelah hian Ramhlun North FC midfielder Lalmawizuala (Astea) chu Man of the match-ah thlan a ni.

Team pahnih te hi Kolasib khelmualah intawng tawhin Electric Veng FC hian 4-0 in anhneh a, an intawn vawihnihnaah erawh chak zawk awmlo in an inhneh tawk. Electric Veng FC hian point 16 neiin Chanmari FC nen an in zat chiah a, head to head-ah Electric Veng FC an san zawk avangin semifinal khelh beiseina an nei ve bawk. Electric Veng FC hian Chhinga Veng FC leh FC Venghnuai an hmachhawn leh ang.

Ramhlun North FC hian point 9 neiin an tlukpui Chawnpui FC aiin an dinhmun a tha hret a, Mizoram Police FC leh Chanmari FC an hmachhawn leh dawn a, relegate thei dinhmunah an la ding ve bawk.

04:00 PM Ramhlun North FC 0-0 Electric Veng FC

MoM: Lalmawizuala, Ramhlun North FC

First half-ah goal hlauhawm hmuh tur a tam lo a, team pahnih te an innawr tawn zak zak hnuah Electric Veng chuan goal thunna hun tha nei hmasa zawkin forward Lalbiakhlua leh David Lalchhuanawma chuan Ramhlun North keeper Eddie-a tan hna hautak erawh an thlen lo. Ramhlun North pawhin goal thunna hun tha neiin box chhung chiah atanga midfielder Lalpekhlua shot tha zet chu Electric Veng Defender Rorelliana chuan a dang hman hlauh.

First half huntawp dawnah Electric Veng chuan hun tha neiin box chhung chiah atanga forward Ramhlunchhunga shot tha zet chu Ramhlun North keeper Eddie-a chuan a dan sak zui a, goal lut awmlo in hun chanve an hmang zo.

Second half-ah pawh goal hlauhawm hmuh tur a tam lo a, Electric Veng chuan hun tha nei hmasa zawkin forward Lalruatfela leh Ramhlunchhunga chuan an hun tha neih an hmang tangkai thei lo a, Ramhlun North pawhin hun tha neiin box sir dingam atanga midfielder Lalpekhlua shot tha zet chu agoal dawn nia alan laiin goal siraj chiah a kal.

Humtawp dawnah Electric Veng chuan goal thuna hun tha annei leh a, bench atanga lut Lalrammawia ball pek tha zet chu forward Ramhlunchhunga chuan goal sirah chiah apet a, goal lut awmlo in khelmual an chhuah san ta a ni.

November ni 21, Ninganiah round 13 khelh tan a ni dawn a, tlai dar 4:00-ah Electric Veng FC hian Chhinga Veng FC an hmachhawn ang a, zan dar 7:00-ah Ramhlun North FC hian Mizoram Police FC an hmachhawn ang.

(adsbygoogle = window.adsbygoogle || []).push({});