Spain captain Alvaro Morata chuan, a ram mipui ten an zah tawk loh avangin tun Euro hi a international tournament hnuhnung ber a nih a rin thu a sawi chhuak.

Atletico Madrid striker hma hun hi chiang lo viau mah se, tun Euro-ah semi-finals an lut a, France an hmachhawn ang.

Club lamah pawh Europe lam a chhuahsan a rinawm chho hle a, Saudi Pro League club Al Qadsiah chuan Morata agent an dawr mek nia report a ni.

El Mundo-in an kawmnaah Morata chuan international football a chawlhsan dawn leh dawn loh chungchang a sawi chhuak duh lo a, tun Euro hi a tournament hnuhnung ber a nih a rin thu a sawi chhuak.

Kum 31 mi hian Spain tan game 78 a khel tawh a, goal 36 a khung tawh. Spain tana goal khung hnem zingah 4-na a ni mek. 2023-24 season khan Atletico tan goal 21 a khung bawk a ni.

"Ka ram mipui te hian min zah tawk lo niin ka hria, Spain-ah chuan ngaihsan em em hi an nei lem lo bawk.

"Tin, ka tel lo hian Spain chu an tha zawk maithei bawk a ni," tiin Alvaro Morata chuan a sawi.