​Ram dang tana ka khelh min phalsak r’u : Benzema

17th November 2019, 09:11PM

French striker Karim Benzema chuan France-in chhawr an tum lo rau rau a nih chuan ram dang tana a khelh phal sak turin French Football Federation (FFF) chu a hrilh.

Tun generation-a centre-forward tha ber zinga mi Benzema hi kum 2015 atang khan a ram France tan a la khel leh lova, sex kaihhnawih chunchangah buaina a neih avang te leh Mathieu Valbuena chu sex tape chungchangah a vau avangin France chuan tun thlengin kum 31 mi hi an la ko leh lo.

Chanchinbu mite chuan tun hnai khan Benzema hi France chuan an ko leh dawn tawh angin ziak mahse FFF president Neol le Graet chuan engtik mah Benzema chu an koh tawh loh tur thu a lo sawi tawha, Graet chuan, “Benzema hi ka player tha tih a ni a, a quality hi vawi khat mah ka la sawisel ngai lo. Kuminah pawh Real Madrid-ah khawvela striker tha ber zinga mi a ni tih a lan tir leh tawha, mahse France tana a zinkawng erawh a tawp tawh,” a ti.

Hemi chungchang hi Benzema chuan a chhangleta, player koh an nih leh nih loh chungchang chu France coach Didier Deschamps-a kutah a innghat emaw a tih thu leh international football chawlhsan mai a la tum loh thu a sawi bawk.

France tana vawi 81 khel tawh Benzema chuan FFF president Noel Graet chhang letin, “Noel, player koh an nih leh nih loh chungchang hi national team coach kutah emaw a awm ka lo ti a. Ka international career a tawp leh tawp loh chungchang hi keima kutah bak a awm lo tih hria ang che. Ka international career a tawp tawh emaw i tih chuan ram dang tana ka khelh hi min phalsak la kan hre mai ang,” a ti.

France tana goal 27 khung tawh Benzema hi Algerian thlah a nih avangin FFF lam hian an phal chuan FIFA hnenah Algeria tana khelh a la dil thei a, mahse France tan game eng emaw zat a lo khelh tawh avangin Benzema hi Algeria tana a khelh phalsak a nih ngai a rinawm loh hle a ni.

Copyright © inkhel.com 2024. All rights reserved.