20 Aug 2015 11:15

Inkhel

Mizo Sports Website hmasa ber

​Raikkonen leh Ferrari la thawh dun zel dawn

Formula One team Ferrari chuan an driver Kimi Raikkonen chu 2016 F1 season-ah an la chhawr chhunzawm zel tur thu an puang chiang ta.

2007 World champion Raikkonen leh Sebastian Vettel te chu Ferrari-ah an la tlan dun zel dawn a, nilaini khan Ferrari chuan Kimi Raikkonen an la chhawr chhunzawm zel tur thu an puang chiang a ni.

Beisei a phak lova, kumin bak Raikkonen hian Ferrari car a khalh a rinawm tawh loh hle, Ferrari chuan Valtteri Bottas an la mai tawh dawn emaw an ti hman tawh, chutih laiin Bottas chuan kum khat dang Williams tan a la tlan ngei dawn tih a lang chiang ta.

"Kum khat dang Ferrari-ah ka la cham dawn, ka tan chuan ka beisei leh duhthusam chhunzawmna a ni e. The Scuderia hi ka chhungte an ni a, ka sawi thin chu hetah hian ka intlansiak zinkawng tihtawp ka duh a ni," tiin Finn Kimi chuan a sawi.

Ferrari hian 2016 thleng bak Raikkonen hi chhawr chhunzawm an tum a rinawm loh, Red Bull driver Daniel Ricciardo leh Force India driver Nico Hulkenberg te chu Ferrari hian an ngaihven mek bawk niin media te chuan an tarlang.