Kimi Raikkonen chuan Pathiannia Spanish Grand Prix an tlan Formula 1 huanga a luh hnuah vawi hnih chu khawvel hel chhuak tawh ang a ni.

Pathiannia Formula 1 Spanish Grand Prix ah khan lap 66 an tlan a, Kimi Raikkonen chuan lap 37 a tlan chhuah chiah khan kan chenna khawvel vawi hnih hel chhuak ang vel a ni chiah a, driver zingah chuan tlan thui ber a ni chiah a ni.

Alfa Romeo driver Kimi Raikkonen chu Spanish Grand Prix ah khan 14-na a ni a, dinhmun sang takah ding ta lo mah se record chi dang chu a siam theih phah ta tho a ni.

Formula One a luhchilh hnuah intlansiaka a tel tawhna zawng zawnga a tlan zat chu an belh khawm a, khawvel hi vawi hnih hel chhuahna khawp chu a tlan tling tawh a, Formula One driver zingah chuan tlan hnem ber a ni a, lap 37 a tlan chhuah chiah khan a hmaa tlan hnem ber record 83,846 km chu a khum chiah a ni.

A hmaa tlan thui ber record siamtu chu Ferrari lama Raikkonen nen pawh lo inkawp tawh Fernando Alonso kha a ni.

Intlansiak hmasa lamah, Silverstone-a 70th Anniversary Grand Prix ah khan Raikkonen chuan driver zinga lap tlan hnem ber record thar a lo siam tawh a, a vanglaiin lap 16,845 a tlanna chiah niin, a hmaa vawi 7 ngawt world champion lo ni tawh Michael Schumacher-a record siam a khum tawh bawk a ni.

Kum 40-a upa Raikkonen hian 2007 kumah khan Ferrari car a khalh laiin world champion title a lo la tawh a, Spanish Grand Prix ah khan tun season chhunga a chet that ber tum a tawng a, 14-na atanga bul tanin, a tawpah 14-na a ni thei bawk a ni.