Ferrari driver Kimi Raikkonen chu Ferrari fans te chuan la chhuak lo turin an duh a, team chuan kum khat dang ka awmtir tura an duhzia tihlan nan mi 74,000 chuang zette chuan ngenna an ziak tawh.

Finnish driver Raikkonen hi Ferrari chuan tun season bak chhawr zui an tum tawh lo niin thuthang a awm a, a aiawh tur hian rookie Charles Leclerc an be fel tawh niin an sawi bawk a. Hetiang boruak a awm takah chuan Ferrari fans rualte chuan change.org lamah ngenna hi an ziak ta a. Sebastian Vettel nen season khat chiah tal chu la inkawptir turin Ferrari team thuneitute chu an ngen a ni.

Kum 38-a upa Kimi Raikkonen chhuak lo tura duhtu zinga hmahruaitu pakhat Christy John chuan, “Kimi hi vawi eng emaw zat chu Sebastian Vettel aiin a che tha a, Monza-ah khan a la thatzia a lantir chiang a, hei vang tak hian season khat tal chu la awm se kan duh a ni,” a ti.

Ferrari team inrelbawlnaah hian internet lama ngenna an ziah hian nghawng a neih vak a rinawm loh hle a, Ferrari hian engkim an tifel vek tawh niin a ngaih theih a. 2007 world champion hi kum 20-a upa, tun season-a Sauber tana inlan ve tan chuan a thlak ngei a rinawm hle.

Raikkonen hi tuna Formula 1 driver la intlansiak zingah chuan a upa ber a, Ferrari driver zingah chuan title la thei hnuhnung ber a ni bawk a, tlar hma lamah pawh a lang ngun ber pawl a ni bawk.

‘The Iceman’ tia a hming lem an vuah hi pa zawiawi deuh mai a ni a, media hmachhawn te hi a ngaina lo hle a, a mize dangdai tak mai avang hian mi tam tak chuan an duh phah hle a ni.