Manchester leh Leicester City te chu Old Trafford-ah an inkhel a, he inkhelah hian a tir lamah goal khat a lut a, he goal vang hian United chuan point 3 an hlawh chhuak hlauh a ni.
Inkhelh hma boruak
Tun season-ah Manchester United chuan bul an tan tha vak lo bawk a, hei hi Leicester City chuan hriain chak theih ngei an tum dawn a. Brendan Rodgers leh a pawlte chu an la tlawm miah lo a, an match hnuhnung pahnihah an chak nghe nghe a. Sheffield United leh Bournemouth te chu hnehin pathumnaah an chho thei a ni.
Anmahni khelmuala chetla tur an ni bawk a, Manchester United chuan point 3 hmuh ngei an tum dawn a. Old Trafford-a an inkhelh hnuhnun ber tumin an tlawm a, an mikhual Crystal Palace chu 1-2 in an hneh lo a, tlawm nawn chu an tum dawn lo hle a ni.
Leicester hian Bournemouth an hneh tuma an khelhtir pahnih chu an thlak danglam a. Harvey Barnes leh Marc Albrighton te chu substitute bench lamah an awm a, an aiah hian Demarai Gray leh Hamza Choudhury te chuan bul an tan a ni.
Manchester United chuan inhliam vangin Anthony Martial leh Paul Pogba te chu an chhawr thei lo a. An khelh hnuhnun bera Southampton nen an inhnehtawk tuma khel atangin pakhat chauh an thlak danglam a, Nemanja Matic chuan Paul Pogba ai a awh a. Harry Maguire chuan a club hlui lakah bul a tan a ni.
Manchester United (4-2-3-1): David de Gea; Aaron Wan-Bissaka, Victor Lindelof, Harry Maguire, Ashley Young; Scott McTominay, Nemanja Matic; Andreas Pereira, Juan Mata, Daniel James; Marcus Rashford
Subs: Phil Jones, Fred, Sergio Romero, Mason Greenwood, Angel Gomes, Axel Tuanzebe, Tahith Chong
Leicester City (4-1-4-1): Kasper Schmeichel; Ricardo Pereira, Jonny Evans, Caglar Soyuncu, Ben Chilwell; Wilfred Ndidi; Demarai Gray, Youri Tielemans, Hamza Choudhury, James Maddison; Jamie Vardy
Subs: James Justin, Wes Morgan, Marc Albrighton, Danny Ward, Harvey Barnes, Ayoze Perez, Dennis Praet
Old Trafford-a inkhel an tan phat atangin Manchester United chuan an nawr na nghal viau mai a, goal thun hmasa zawk nih ngei an tum hle.
Minute 7 chauh an la khel hman a, Leicester box chhungah Caglar Soyuncu chuan Marcus Rashford chu a nek tlu a, hei vang hian referee chuan Manchester United chu penalty a hlawhtir a. Penalty hi Rashford chuan petin, Kasper Schmeichel chuan a man lo chiang hle a, United chuan 1-0 in hma an hruai nghal der a ni.
Tun season chhungin Premier League-ah penalty vawi 10 a awm tawh a, heng zinga 4 hi United hian an pet a. Old Trafford-a goal an thun hmasaknaah United hi Premier League game an khelh hnuhnun 133-ah an la tlawm miah lo a. Hengah hian vawi 122 an chak a, vawi 11 chu an khingpuite nen an inhnehtawk a ni.
An khelh chhunzawm leh zel a, Leicester chuan an si phurh chu sut an tum hle a, mahse United tlar hnung chu an pal tlang thei mai lo thung a. Goal thun theihna hun tha chu an insiam ve zeuh thin a, James Maddison leh Ben Chilwell te chu David de Gea chuan a lo dang chat thei zel a ni.
Leicester City chuan inkhel an thunun chho deuh zawk mah a, ball pawh an chang hnem zawk a, heti chung hian half time thlengin Manchester United chuan 1-0 hma an hruai chhunzawm zel thung.
Second half an khelh leh pawhin mikhual team chu an langsar chho leh viau a, heti chung hian an player hlui Harry Maguire te chu an duh angin an pal tlang thei meuh lo a ni.
Minute 83-ah United hian goal an thun belh teuh hle a, free kick an hlawh chu Rashford chuan a pet a. Ball chuan wall a thlawh khum a, Leicester goalkeeper Schmeichel pawhin a man pha lo a, mahse, ball chuan crossbar a fuh hlauh thung.
Hun tawp thlengin goal dang a awm zui ta lo a, Manchester United chu 1-0 in an chak a, Ole Gunnar Solskjaer hnuaiah game 17 chhungin vawi 4 chu an chak ve leh thei ta a ni.