13 Aug 2019 05:12

inkhel

Raheem Sterling leh AirJordan te £100 million a inzawm an tum

Raheem Sterling chuan AirJordan football boot a bun maithei a, inremna an ziak ta a nih chuan £100 million vel zet chu Sterling hian a la thei dawn a ni.

Kum 24-a upa Raheem Sterling hi Nike nen an inzawm mek a, an contract ziah chu a kum tawpna an hmang chho mek a. Hetiang a nih lai hian American sportswear company lar tak AirJordan chuan inremna neihpui an duh niin an sawi a, hei hi an titlang a nih ngat chuan khawvela boot chungchanga inremna lian ber pawl a ni ang.

AirJordan hi 1984 atanga tan chhoh niin, NBA star Michael Jordan nen inkawpa an tih a ni a. Tun hnuah hian basketball player lar tak takte leh Major League Baseball star te nen an inthlun zawm nasa thei hle a ni.

Sterling hian company hrang hrang chu contract a ziahpui nual a, Microsoft nen Xbox console tilar turin inremna lian tham tak mai an ziah bakah FIFA football video game neitu EA Sports nen pawh tha tham tak chu an ziak bawk a. Fashion brand H&M te pawhin Sterling hi thawhpui an duh hle a, Gillette pawhin an hmutai viau niin an sawi.

Season liam taah khan AirJordan chuan football khawvel an dai lut ve tan a, Paris Saint-Germain nen an thawk dun a, Ligue 1 champion thawmhnaw leh an bungrua thahnem tak an siam a. An thil tih chu a hlawhtling an ti hle a, an huang zauh belh zel an duh phah a ni.

Manchester City star Raheem Sterling chu tun hnai thla 12 chhunga infiammi zinga boruak nei lian pawl tak niin an ngai a, hei vang hian contract pawh ziahpui an duh phah a. Infiamna huanga vun dum deuh an tih dan te, kumin May thlaa Euro 2020 qualifier an khelh tuma Montenegro tantute’n England player te an auh dan vel tha a tih loh thu te Sterling hian a sawi chhuak a. Vun rawng avanga inhmuhsitna te, chi inthliarna tih velte do turin hma a la nasa hle.

English star hlutna hi a sang ve zel a, season hman zawh takah khan PFA Young Player of the Year atan an thlang a, Manchester City chu Premier League champion a nihpui theih bakah England captain te a ni bawk a ni.

Tun season bul tanna atan City game hmasa berah Sterling hian hattrick a siam a, Pathianni khan West Ham United chu 5-0 ngawtin an hneh a ni.