26 Aug 2019 05:47

inkhel

Rafael Nadal leh US Open 2019

Kumin US Open khelh turah Rafael Nadal chuan beiseina a nei sang hle a, tun hnaiah Rogers Cup title a humhim zo chauh a, hei vang hian inrintawkna pawh a neih san phah lehzual a ni.

Rafael Nadal hian Grand Slam title vawi 19 lak theih a tum dawn hle a, hemi ti thei tur chuan a elpui ber pahnih Roger Federer leh Novak Djokovic te chu a hneh theih a ngai dawn thung.

Vawi thum ngawt US Open champion lo ni tawh hian Flushing Meadows-ah a vawi lina atan title lak leh ngei hi a duh a, hemi ti thei tura a zinkawng hmasa berah first round-ah Australian John Millman a hmachhawn dawn a. John Millman hi zuam ngawt chi a ni hauh lo a, nikumah pawh vawi nga champion tawh Roger Federer a hneh thei a ni.

Nadal hian tlema player ranking hniam deuh pawh theihtawp chhuahin a hmachhawn thin a, a inthlahdah ngai loh avangin Millman hi chak tura beisei ngam a ni lem lo hle a. Spaniard Nadal hi a chak a nih chuan second round-ah Australian tho a hmachhawn leh hmel hle a, Thanasi Kokkinakis chu a hmaa ding thei tura ngaih a ni.

Second round-ah hian Rafael Nadal chuan Thanasi Kokkinakis hi a hmachhawn a nih pawhin a chak zawk ngei a rinawm hle a, heti a nih chuan third round a lut chho thei dawn a. Hetah hian Spanish mi tho, veilam hmang thiam ve bawk, Fernando Verdasco nen an intum thei ang.

Anni pahnih hi a hma pawhin Grand Slam-ah chuan an lo intawng nual tawh a, an inkhel boruak pawh a sang thei hle a. Nadal-a tan hian a zinkawng zawh chhohah Verdasco chu a la khirh ve deuh ber a nih a rinawm a, heti chung hian vawi 18 ngawt Grand Slam title la tawh Nadal chu tlang chho zawk tura beisei a ni.

Fourth round-ah chuan Nadal hian John Isner leh Marin Cilic te inkhela chak zawk zawk a tum theih hmel hle a. A hma atang tawhin hard court bikah phei chuan service tha thei deuh deuhte hian Nadal chu an lo chhaih buai thei viau mai a. Hetiang hi a hmaa boruak lo awm tawh ni mahse, tun hnaiah Cilic leh Isner te hi an che fuh vak lo a, hei vang hian chuti taka hlauhawm an ni lo thei.

John Isner emaw, Marin Cilic emaw hi Nadal chuan hneh leh ngei turah a ngaih theih a. Quarter final-ah chuan NextGen leader an tih mai, Alexander Zverev chu Nadal hmaa ding thei tura ngaih a ni a. Zverev hi Nadal hneh thei teuh berte zinga mi niin, tun tumah pawh hmachhawn khirh ve tak tura ngaih a ni a. Hetih rual hian Grand Slam velah a chet that vak thin loh avangin a laka rinna dah san vak erawh a har viau.

Semi final-ah chuan Dominic Thiem chu Nadal nen inhmachhawn thei tura rin kai ber a ni a. Eng court-ah pawh tha chho em em Dominic Thiem hi Nadal nen hian an lo inkhel ve nual tawh a, US Open-ah ngei pawh an lo inhmachhawn tawh a ni.

Dominic Thiem hi Rafael Nadal tan chuan a hlauhawm tham ve hle a, mahse tawn hriat ngah tawh zawk chu semi final-ah pawh hian a dingchang zawk tura ngaih a ni tho a ni.

Final-ah hian Nadal chuan Novak Djokovic leh Roger Federer te hi a hmachhawn thei ve ve dawn a. Anni pahnih hi semi final-ah an intawng thei ngei dawn a, heta chak zawk zawk hi Nadal chuan final a khelhpui thei dawn a ni.

Novak Djokovic leh Roger Federer te tan chuan US Open title la tur hian match hniha Big 3 mi pahnih hneh a ngai dawn a, hei hi thil khirh ve tak mai a ni dawn a. Hetiang boruak te thlir kual hi chuan Rafael Nadal hi chan tha ber chantir mai a awl dawn hle a ni.

Rafael Nadal hi kumin US Open ah hian a champion a nih chuan US Open title hi vawi 4 a la thei tawh dawn a ni.