01 Sep 2018 10:19

inkhel

Rafael Nadal a la tlang zel

US Open third round-ah Rafael Nadal chu Karen Khachanov nen an inkhel a, 2011 hnua Russian laka la tlawm miah lo Nadal a che fuh lo tep a, mahse a hnuah insiamthain a khingpui chu a lehthal leh a ni.

World No. 1 Rafael Nadal hian a hma chuan Russian player te chu awlsam takin a hneh thin a, tun tumah erawh a rin loh ang deuhin thil a kal a, Karen Khachanov chuan set hmasa ber a la a. Nadal hian theihtawp a chhuah ve leh a, a hnu lam set thum a la zawn thei hram a, a chak zawk a ni leh hlauh a ni.

27th seed Karen Khachanov leh top seed Rafael Nadal te hi darkar 4 leh minute 23 zet mai an inkhel a, Spaniard Nadal hian Flushing Meadows-ah hetianga rei hi a la khel ngai lo a. A match hmasa pahnihah harsa lo takin a chak a, a hmaa set hloh miah loa vawi 4 ngawt a lo hneh tawh, kum 22-a upa chu a zuam sual deuh ni te pawhin a ngaih theih..

Set hmasa berah Russian tlangval chuan ace vawi 8 ngawt a nei a, 7-5 in set khatna hi Khachanov chuan a la zui nghe nghe a. Tennis khawvelah chuan Nadal nek chep chu a fuh lo tiin an lo sawi thin a, chu chu a takin a thleng chho zui a.

Nadal chuan tan a la ta tak tak a, set hnihnaah 7-5 in a chak a, set thumna leh set linaah pawh a chak zui leh hram bawk a, Rafael Nadal hi 5-7, 7-5, 7-6(7), 7-6(3) in a chak a, fourth round-ah Nikoloz Basilashvili nen an inkhel leh dawn a ni.

Inkhel dangah fifth seed Kevin Anderson chuan Canadian player Denis Shapovalov chu 4-6, 6-3, 6-4, 4-6, 6-4 in a hneh a, fourth round-ah Austrian pa Dominic Thiem nen an inkhel leh dawn a. Anderson hian nikum khan US Open final a lut a, mahse final-ah hian a chak zo ta lo a ni.