Alexis Sanchez chu transfer window inhawn leh hunah Old Trafford atanga chhuak thei mai dinhmunah a ding mek niin hre chiangtu inti thenkhatin an sawi.

Manchester United player zinga hlawh hnem ber Sanchez chuan Arsenal chhuahsana Old Trafford a luhchilh hnuah beisei a pha lo hle a. Emirates Stadium-ah FA Cup trophy vawi 2 a la a, a aia phaitual hnim hring zau zawk tlan theih inbeiseiin United hi a pan a, mahse a beisei ram a thleng thei lo hle a, tunah chuan sawisel bur pakhat a ni mek a ni.

Chilean superstar hian Arsenal-ah a khel tha thei hle a, a chet dan chu khawvelin an thlir thup thin a. Season thum chhung chu a zawnin Arsenal player tha ber a ni thei hial a, goal a thun theih bakah mi dang thun tur a siamsak hnem thei hle a. Manchester United chuan an rim ta a, beiseina sang tak nei chungin man to em emin an lei a, an suangtuahna chu a tak ram nen a inang ta lo hle a ni.

Arsenal a chhuahsan khan football khawvel chuan United lama a chet dan tur an lo ngaihven hle a, Arsenal tana a chet that thin ang bawka che tha turin an beisei vek hlawm a. A duhthawh deuh phei chuan Emirates Stadium-ah aiin Old Trafford-ah boruak a neih that zawk an ring nghe nghe a, Manchester United chu a vawi 21-na atan Premier League title a lakpui loh reng an ring lo.

Suangtuahna leh beiseina chi hrang hrang a tam a, Barcelona player hlui Sanchez hian United tana a khelh hmasak ber tum chu FA Cup a Yeovil Town nen an inkhelh tumin a ni a, mi goal thun tur vawi hnih a siamsak a, bul a tan tha viau a.

United tana a goal hmasa ber chu kumin February 3 ah a thun a, hemi tum hian Old Trafford-ah Huddersfield Town an mikhual a, United hi 2-0 in an chak a ni.

2017-18 season chhungin Sanchez hian Premier League goal hnih a thun a, hei bak hi chu United tana game 17 a khelh tawhah a la thun belh ta lo a. Tun season-ah pawh goal hi a la thun thei lo a, a laka beiseina an neih san viau laia goal a thun theih loh avang leh khelmualah a tangkaina a lan chhuah ngai loh em avangin United tantute an thinrim tawh a ni.

Mipui lampang chauh an beidawng lo a, club thuneitu lampang pawhin beiseina an nei chau tial tial a, West Ham United nen Premier League-a an inkhelh dawn pawh khan Chilean thiampuipa hi squad-ah a tel pha ve ta lo hial a ni.

Alexis Sanchez hian kum 17 a nih laiin Cobreloa ah bul a tan a, he club-ah hian season khat a awm hman tihin 2006 khan Italy a pan a, Udinese a zawm a. Loan in a chhuak zui a, Colo-Colo chu league title a lakpui a. A kum lehah loan bawka a zawm River Plate chu league title a lakpui leh bawk a. 2008 khan Udinese lamah a kir leh a, season thum chhung chu he club hi a awm chilh a.

Barcelona chuan 2011 khan €30 million (£25 million) zetin an lei a, Chile player zingah chuan a aia man to an la awm ngai lo a. Season hmasa berah Lionel Messi leh David Villa te nen inkawpn an hlauhawm thei hle a, Copa del Rey, Supercopa de Espana, UEFA Super Cup leh FIFA Club World Cup title a lakpui nghal a.

2012-13 season-ah khan Messi, Sanchez leh Villa te chuan goal 82 ngawt mai an thun a, La Liga title an lak bakah Supercopa de Espana chu an humhim zui a. Hemi season-ah hian Sanchez chuan goal 21 ngawt mai thunin, mi thun tur vawi 14 a siamsak bawk a ni.

2013 khan Barcelona chuan Neymar an la lut a, hei vang hian 2014 khan Premier League club Arsenal chu €31.7 million (£35.8 million) in a zawm ta a. Barcelona tan khan game 88 a khel hman a, goal 39 chu a thun hman a ni.

Arsenal a zawm hnuah Sanchez chu a che tha nghal viau a, Arsenal tan goal a thun theih bakah mi thun tur a siamsak teuh bawk a. Arsenal chu FA Community Shield a lakpui bakah FA Cup trophy vawi 2 a lakpui bawk a. 2016-17 season chhung ringawt khan Sanchez hian goal 30 a thun a, mi thun tur vawi 14 a siamsak bawk a, FIFPro World XI ah pawh a tel pha a ni.

Game 122 khelhah goal 60 a thun hnuin boruak tha lehzual hip duh vangin January, 2018 ah Arsenal a chhuahsan a, Manchester United a pan ta a, a tum ang boruak thiang erawh a hip thei meuh rih lo a ni.

Chilean forward ‘El Niño Maravilla’ (The Wonder Child) hian ram tan 2006 atang khan a khel tan a, Chile tan vawi 121 a khel tawh a, an ram tana khel hnem ber niin goal 39 a thun tawh a, an ram tana goal thun hnem ber a ni bawk a ni.

A hmain che ropui viau thin mahse tuna a hun hman mekah mi beisei ang a thlentir theih loh avangin a dinhmun a chiang ta lo hle a, club lam pawh hian hralh chhuah mai an rilruk tan a. January thlaah chuan engkim a chiang tawh turah a ngaih theih ang.