19 Nov 2018 07:08

inkhel

Quarter final-ah awlsam takin Mary Kom a lut

Indian boxer chhuanvawr MC Mary Kom chuan a khingpui Kazakhstan boxer chu hnehin AIBA Women's World Boxing Championships quarter final a lut a, gold medal vawi 6-na a hnaih chho mek.

Mary Kom chuan 48kg category-ah Kazakhstan boxer Aigerim Kessenayeva a hmachhawn a, harsa lo takin a hneh a. Sarita Devi chuan 60kg category-ah a khingpui a hneh ve ta lo a, a kawng a tawp tawh thung.

Gold medal 6 lak tuma chet la leh tan, 2010 hnua a medal hmasa ber beisei leh mek, kum 35-a upa Mary Kom chuan Aigerim Kessenayeva a hmachhawn a, Mary Kom chu 5-0 ngawtin a chak a, quarter final a lut fel tawh a ni.

First round-ah Mary Kom chuan fimkhur takin a khel a, second round atangin left-right combination a hmang nasa tan a, clear punch chu ngah bik vak lo mahse judge te chuan Manipuri boxer chu an dah chungnung zawk vek a. Judge pali te chuan Mary hi 30-27 an pe a, judge pakhat chuan 29-28 a pe bawk a, a chak chiang viau a ni.

Thawhlehni hian quarter final-ah Mary Kom chuan Chinese boxer Wu Yu a hmachhawn leh ang.

Kum 36-a upa Sarita Devi chuan Irish boxer, 2016 World Championship silver medallist Kellie Harrington a hmachhawn a, Kellie Harrington hi 3-2 in split decision in a chak a. Third round-ah 2006 gold medallist Sarita hi standing count pek a ngai a, mahse result chu dik a tih loh thu sawiin, a chak lo zawka a tang chu a lungawi lo hle.

Indian boxer pathum - Manisha Moun (54kg), Lovlina Borgohain (69kg) leh Kachari Bhagyabati (81kg) te pawhin an khingpuite theuh an hneh a, quarter final an lut ve bawk a. Manisha Moun leh Lovlina Borgohain te hi 5-0 ve vein an chak a, Kachari Bhagyabati hi 4-1 in a chak bawk a ni.

Kum 20-a upa Manisha Moun hian quarter final-ah top seed leh 2016 World Championships silver medallist Stoyka Petrova, Bulgaria a hmachhawn dawn a. Kum 21-a upa, Assamese boxer Lovlina Borgohain chuan Scott Kaye Frances, Australia a hmachhawn ang a. A vawi khatna atana World Championships khel ve Kachari Bhagyabati chuan Paola Jessica Caicedo, Columbia chu a hmachhawn leh ang.