Manchester City chuan FA Cup, Premier League leh Champions league no mawi an chawi, ropui takin an treble a, hetih lai hian Argentina forward Alvarez erawh trophy 4 nen season a khar hem mai.

Tin, Julian Alvarez hi season khata European treble leh World Cup hlawh chhuak thei player hmasa ber a ni bawk.

World Cup champion ruala kum khat chhunga continental champion chu player 9 an lo awm tawh a, mahse Alvarez anga domestic league leh cup trophy nena hlawhchhuak rual vek an la awm lo. City an treble rual hian Argentinian Alvarez chu a quadruple heu mai.

Champions League final-ah khan khelmual chhung a lut ve chiah lo.  De Bruyne a inhliam khan koh luh theih a ni a, mahse a aiah Guardiola chuan Phil Foden a chhawr ta zawk.

Argentina international hian knockout match-ah starting XI a chang ngai miah lo a, mahse semi-final-a Real Madrid an hneh khan goal a khung.

FA Cup final-ah pawh khan bench-ah a thu a, City match hmasa 5-ah vawi 4 starting XI a chang ve. Premier League lamah pawh an chhawr rim lutuk lo. Amah aiin Joao Cancelo chu City tan tun season-ah a inlan hnem zawk. Tun season competition-ah Alvarez hian starting XI vawi 13 chiah a chang a ni. 

Hetih lai hian City-in an treble theih nan hian tha a thawh hlawk ve hle tho. Hetiang ti thei tur hian squad neih chhah that a ngai a, bench-a player rintlak leh danglamna siam thei an awm a ngai a, City player zawng zawng, an khel tam emaw tam lo emaw, an vai mai hian an treble theih nan tha an thawh vek a ni.