07 Feb 2019 04:14

inkhel

​Qatar Open-ah Osaka kan hmu dawn lo

US Open leh Australian Open champion lai; hmeichhe world no.1 ni bawk Naomi Osaka chu a hnung a nat avangin kar leha neih tur Qatar Open-ah a inlan thei dawn lo.

Thla hmasa lawk kha Japanese tennis player Osaka hian Grand Slam la in Australian Open-ah a champion a, ranking thar berah world no.1 ni bawkin,a hnung na avangin a chawlh rih lawk a ngai dawn niin a lang.

Kum 21 mi Osaka chuan Doha-a khelh tur Qatar Open-a a tel theih loh tur thu sawiin, “Doha atanga ka inhnukdawk tur hi pawi ka ti hle a, ka fans-te hmaa inkhelh ka tum em em chu ka thei dawn ta lo. Hlim taka hun in hman ka duh a, nakkumah kan inhmuh theih ngei ka beisei a ni,” a ti.

Osaka hian hnung na a lo nei tawh thin a, nikum October thla pawh khan a hnung na avang hian Hong Kong Open-ah a lo inlan thei lo tawh a ni.

Osaka hi kum 21 mi chauh a la ni na in, a theuneu lo hle a, Japanese player Grand Slam singles title la thei hmasa ber a ni.Kuminah Australian Open la zui lehin sawilan tawh angin ranking thar berah pakhatna a ni a, Asian player world ranking-a no.1 ni thei hmasa ber a ni bawk. A pa hi Haitian mi niin a nu hi Japanese a ni a, USA-ah kum thum mi lek a nih atangin a awm tawh a, mahse Japan hmingin a khel thin thung a ni.