​Pulisic-a’n Chelsea nuam a ti

18th July 2019, 06:07AM

Chelsea player thar Christian Pulisic chuan Chelsea chu khawvela club lian ber zinga mi an nih thu a sawi a, Chelsea tana a khel thei tur chu nuam a tih thu a sawi tel bawk.

Pulisic chuan, “Chelsea ka ngaihtuah hi chuan player ropui tak tak rilruah a rawn lut nghala,ka tet te atangin Frank Lampard leh player dang Premier League leh Champions League-a ropui tak taka lo khel tawh hi ka hre chhuak reng thin.

“Ka tan chuan Chelsea hi khawvela club lian ber zinga mi an ni a, tunah Chelsea tan ka khel thei ta mai hi ka lawmin nuam ka ti hle a ni,” a ti.

Kumin January thla khan Chelsea chuan Pulisic hi German club Borussia Dortmund atangin an lei a, mahse Pulisic hi season tawp thleng loan-in Dortmund tan a khel chhunawm.

Pulisic hian Chelsea-a contract a ziah hnu atanga thla ruk chuang a liam hnuah Chelsea tan a game hmasa ber a khel dawn niin a langa, Chelsea hian an pre-season tour-a Kawasaki Frontale an hmachhawn hunah Lampard chuan Pulisic hi a khelh tir ngei hmel.

Pulisic chuan a nihna sawiin, “Ka tlan chakin ka creative hle in ka hria a, he team tan hian tangkai taka khelh ka tum dawn a, kawng hrang hrangin attacking game khelh a tum dawn a ni. Premier League-a che tha tur hian theihna ka nei tha tawkin ka hria a, ka khelh that ngei pawh ka beiseiin ka phur tawh em em a ni,” a ti.

Pulisic hian CONCACAF khela USA tana a fehchhuah hnuah Chelsea squad hi pre-season tour an neihnaa a zawm tawh a, Zirtawpni hian Chelsea chuan Japan-ah Kawasaki Frontale hmachhawnin kar leh lamah Japan-ah tho hian Barcelona a hmachhawn dawn a ni.

Copyright © inkhel.com 2024. All rights reserved.