Chelsea-in kumin January thlaa an lei fel American winger Christian Pulisic chuan loan-a tun season chhung Borussia Dortmund-a a khelh hnuah Chelsea a zawm fel ta.
Chelsea hian kum 20 mi Pulisic hi pound maktaduai 58 sengin kumin January thla khan German club Dortmund atang hian an lei fela, Dortmund hian tun season tawp thleng loan-in an kawl zui.
Pulisic hian kum 15 mi chauh a nihin Dortmund a zawm a, kum 2016 atang khan Dortmund senior team tan a khel tan. Pulisic hi kum sarih mi a nih laiin England-ah kum khat chhung a khawsa tawh a, Chelsea inkhel pawh hetih hunlai hian a hmunah a en nghe nghe.
Pulisic hi wing leh attacking midfield role-ah a khel thei ve ve a, Chelsea thiampuipa Eden Hazard anga tha a nih chak thu a sawi bawk. Pulisic chuan, “Eden hi player tha tak a ni a, chu chu tu pawhin kan hria a, amah anga tha nih hi ka chakin team tan theihtawp ka chhuah dawn a ni.
“Ka thiam thil te hmang tangkaia, ka tlan chakna leh ka chet ranna te hi team tana hman ka chak tawh hle bawk. He hmunah hian goal khung tur leh assist tur ka rawn kal a, lukhawng lian tak neiha, team tana inpe mi tak nih ka tum.
“Wing-a ka khelh hian a khawilam zawk pawh nise ngawng ka nei lian thei berin ka hria a, no.10 ang pawhin ka khel thei a, Dortmund-ah khan wing leh attacking mdfield-ah ka khel ve ve a, national team tan no.10 ah ka khel nasa bawk. Hmatawngah chuan khelh theih lohna ka nei lova, mahse Dortmund-a ka awm lai kha chuan wing-a khelh nuam ka ti ber.
“Chelsea khelh dan hi ka ngainat zawng a ni a, ka khelhdan nen pawh a inmil viau ka beisei,” tiin Chelsea website a hrilh.
Pulisic chuan kum sarih mi a nih laia England-a a hun hman tawh chungchang thlir kirin, “Ka pa nen Premier League game en turin kan kal chhuak zeuh zeuh thin a, Premier League club dang bakah Chelsea inkhel ka en pawh ka la hria.
“Khatih hun lai khan Drogba leh Lampard-te inkhel ka en a, ka la hriat reng chu kha inkhelah khan Drogba-a’n penalty a pet goal lai kha a ni. Professional footballer nih hi ka thil chak reng thin a ni a, a bikin Europe-a khelh ka chak thin. US-a ka awm laiin Premier League hi ka en ber thin a nih avangin ka khelh chak berna a ni bawk.
“Kum 15 mi ka nihin Dortmund ka zawm a, ka thil chak thin a ni a, a hun kha a dik chiahin ka hre bawk. Tunah erawh hmalam ka pan zela, Chelsea ka zawm a hunin ka hre leh tawha, hun ropui leh nuam tak Dortmund-ah ka hmang.
“England-ah ka lut thei hi ka lawm em em a, he league-a ka khel tur hi ka phur tawh bawk. He league hi stage lian ber a ni a, stage lian bera ka theihna lan chhuah tir hi ka thil duh leh chak a ni,” a ti bawk.