Alan Walker hla On My Way kan ngaithlak chang hi chuan mitthlaah map zawng zawng kha a rawn lang leh uar uar thin.

Kum 2018 kum tir lamah PUBG Mobile tlangzarh a ni a, kum tawp lamah chuan Mizo khel an thahnem tawh khawp mai. Kum 2019 a rawn inherchhuak a, Mizo thalai tam takin Pubg Mobile game an khel ta suau suau mai.

PC Game lamah chuan multiplayer game lo hmelhriat tawh hlawm mah ila, mobile phone atanga khelh theih free-to-play multiplayer battle royale game a rawn chhuak chiah kha chu, PC aiin khel thei kan tam ta fe zawk a, Mizo thalaite zingah PUBG Mobile khan hmun lailum a luah kan ti lo thei lo.

Kum 2019 kum tawp lamah Covid 19 hrileng kan hre chho, China chu nasa takin a nuai tih chanchinthar lamah kan hria a. Kum 2020 Chapcharkut ropui taka kan lawm lai pawh khan hlauthawng dep depin kan awm tawh a nih kha.

Khami hnu atang khan Covid avangin Zoram pawh kan buai chho ta. Inkhawm theih a ni lo a, chhun lamah pawh hna leh zirna in kal mumal theih a ni ta lo. Inah kan tawm tan ta a, a kum hmasa lam atang tawha PUBG Mobile lo uar tawh te khan lockdown a nih chhoh khan a aia nasa zawkin kan khel chhunzawm ta a nih kha.

E khai... Uar tak kha kan ni hlawm, inkhel facebook page lamah pawh Room kan host a, European Football mai bakah, Tualchhung sports pawh a chawl chho thup bawk si. Game kha kan khel ta tluk tluk a ni ber mai.

Chhun leh zan khan awmzia a nei lo, inah kan tawm a, zanah kan mu lo, chhun lamah kan mu thung. Khatiang khan thalai ten hun kan han hmang chu a ni a. Eng emaw zawng tak chuan a ngaihnawm thin khawp.

PUBG Mobile a rawn chhuah khan, Multiplayer gaming hi Mizo thalai tam zawk teah chuan thil thar a nihna chen a awm. Hrilengin min tihbuai hma atang tawh khan kan uar ve hle a nih kha.

Kan squad zingah zan lama inkhawm te kan han nghak ngar ngar a, an rawn bang ta tihin an rawn lut. Chutah zing dar 3 vel thleng misual kan han do ta thin kha a ni a. 

Kan thianpa pakhat chu an in chung bathlar atangin a khel thin, zan khat chu a lo au ring deuh ni tur a ni. "Misual misual, keimah chauhin ka awm. Min rawn pui ru," a ti chul. An thenawmte an lo tlankhawm hial.

Team khatah player 4 chiah a awm theih si, thian 4 aia tam kan nih hian a buaithlak ta thin. Tawngkam ngeia, "Lo chhuak rih mai rawh aw nang chu," han intih te phei kha chu rilru hi a na duh thin khawp mai.

Thian 3 te chuan vai pakhat tanpuiin an lo khel mek, an game khelh zawh hun kan nghak char char a, request pawh kan thawn, anni pawhin min lo accept thlap. An game khel lai pawh a tawp thlengin kan spec. Mahse an han khel zo ta cheng a, midang an han matching pui leh daih thin te pawh kha rilru a na duh thin khawp mai.

Hmeichhe thenkhat thiam tak tak an awm, chutih laiin hmeichhe thenkhat erawh, mipa game ngainat a nih avanga mipa lawm nih an tum avanga khel ve pawh an awm teuh bawk. Hmeichhe voice an hriat tawh hi chuan mipa thenkhat hi chu an buai nghal vek thin. An squad-a hmeichhe awmchhun kha an han duhsak em em thin khawp a, an tluk leh chhan phet an tum, revive te kha an inchuh hial thin a nih kha.

Khelhpui te zingah loot chuhhelh tak an awm hian a ninawm thin. Flare gun kan han kap a, a kaptu ngaichang miah loin an lo chuh ve bawrh bawh a. Thenkhat flare gun an neih avanga hmun danga va kap ta daih pawh an awm thin a nih kha.

Thian ho tak taka khelh tluka nuam kha a awm bik lo ang. Kan in support tlang em em, rank push chang a awm, rank push mah ni ila, thiante an tluk tawh hi chuan tluk ve hi pawi kan ti lo, kan bawh bawrh bawrh thin. Game mah nise, a feeling kha a mak khawp mai. Thiante an thih vek tawh hnua mahni chauha khelh chhunzawm zel kha kan duh ngai lo a, Grenade hmangin kan in BOMB hlum mai thin a nih kha.

Matching nei turin lobby-ah kan awm thap, thian luck deuh neih hi chuan a buaithlak thin khawp mai. "Call ka dawng lawk, min lo nghak ru," an han ti a. Rinawm takin kan nghak, minute 20 chuang te phone an han hmang a, a va han rei duh thin tlak tlak tak.

Chet that zan a awm a, chicken dinner miah loh zan te pawh a awm thin. Chet chhiat zan hi chuan, kan han mu a, kan inkahna hmun hrang hrang kan ngaihtuah let, room kilkhawr ber thlengin kan mitthla thei hial. "Chuti chuan lo ti ta zawk ila, smoke te kha ka ak nual si a, lo vawm ta zawk ila," te kan ti leh hnuhnawh rauh rauh thin.

Game mah nise, kan rilru leh ngaihtuahna a hruai thui thin khawp mai. AWM a rawn ri thum dut dut mai hi chu kan bawk rawp rawp thin. Mahni chauhin kan dam tawh, School Apartment building chung lamah kan biru a. Misual la dam kim ho an rawn tlan lut ri tuk tuk hi chu thin hi a phu rang ve thei hial.

Covid hrileng avangin kan khelh nasat zual phah em em, mahse kum 2020 September thla tirah India sawrkar chuan India ram pumah PUBG Mobile a ban ta rup mai. India server shutdown mah se, singapore server lamah kan la khel chhunzawm thei zel a. Mahse ping a san chhoh em avangin a tih hleihtheih loh chin a thleng ta.

Engtik lai pawhin Mizo zingah Global khel la awm mah se, a khel erawh an tlahniam tial tial a. Kum 2021 July ni 2-ah BGMI tlangzarh a ni a, Mizo tam takin an bawh leh huk. Mahse a kum leh July thlaah India sawrkar chuan a ban chhunzawm leh a. 

Kumin May ni 26 khan BGMI ban chu tihtawp a ni leh ta a. Mizo zingah he game hi khel an la tam, mahse kum hnih thum liamta ang kha chu a ni thei tawh lo. Global lamah erawh Mizo khel an la awm ve reng a, mahse game khat chhunga Mizo awm khawm teuh ang kha a awm ta meuh lo. Mizo hming kan han knock hi chuan kan lawm em em thin tawh a nih hi.

Gaming hi mi thenkhat tan chuan eizawnna tham a ni a, hetih lai hian kan internet te a la chak tawk loh avangin competition hmachhawn tur chuan a la buaithlak deuh. Thil reng reng hi a hunlai hi a awm ve a, lo chhiatpui ve hman hi an awm ziah bawk.

Gaming pawh Mizo thalaite zingah chhiatpui an awm nawk, mahse a hunlai a zo a, nunphung pangngai anga nun chhoh leh hun a awm thin. Game avanga thian tha tak tak ni chhunzawm te pawh sawi tur an awm teuh a ni.

Tunah zet chuan Mizo thalai zingah PUBG MObile community a tlahniam ve nasa tawh, lung erawh a tileng thin khawp mai. Alan Walker hla On My Way ngaihthlak leh chang hi chuan, Severny-a kan inkah lai te, Military Base-a misual kan push ho lai te, Rozhok warehouse-a kan tawm khawm thap lai te mitthlaah a rawn lang leh thin.

Kan thlawh laiin kan lo DC palh, Zharki-ah mahni chauh ten kan tla a, Zharki thingkung par han mawi zia hi sawi lai laiin mitthlaah a rawn lang leh. Military, Pochinki, Novo leh Georgopol container han HOT thin zia kha. Motor-ah kan han chuang chiah a, On my Way hla a rawn in play, rei a in play hman lo, silai riin a chhunzawm nghal zat thin bawk a.

PUBG Mobile khelhpui tam tak te khan nupui pasal an nei tawh hlawm, tunah chuan fa te an nei ve duah tawh bawk. Thenkhat chuan mual min liamsan tawh bawk a. PUBG Mobile Global-ah han lut leh mah ila, thian te account chu a lo thi bul tawh hlawm a, game kan khel hman ta lo hlawm a ni e.

Engkim hian hunlai hi a nei vek a, PUBG Mobile pawh khel la awm teuh mah se, a hunlai a zo ta a ni e.

Comment-na lamah khan han sawi ve hlawm teh u khai, kan lo chhiar ve ang e.