Tunlai Mizo thalaite'n mobile games an khelh nasat berte zinga mi PUBG mobile games intihsiakna neih mek a ni a, Dawrpui Vengthar eSports buatsaihin July ni 21 atang khan Tournament buatsaih a ni a, Zonet cable leh Dawrpui Vengthar eSports YoTube channel atangin live-a pek chhuah thin a ni.

PUBG Mobile tournament hi PUBG Mobile Inter-Veng Tournament (PMIV) 2020 tia hming phuah niin, veng leh veng inelna a ni a. Veng 1 atanga team 3 zel tel theih a nih angin Mizoram khua leh veng hrang hrang atangin team 182 zet chu he tournament-ah hian an inziak lut.

July ni 21 atang khan qualifying khelh tan a ni a, pool 8-ah then niin zan khatah match 9 khelh thin a ni. Qualifying hi zan 4 neih a ni a, pool tin atang hian a titha team 10 zel thlan chhuah niin, team 80-in quarter final an lut a. Qualifying pool champion-te hian lawmman Rs. 1,000/- theuh an dawng a ni. Pool champion-te chu:
Pool A - Dam Veng
Pool B - Tuidam Team B
Pool C - Kulikawn Team A
Pool D - Lawngtlai College Veng
Pool E - Lawngtlai Electric Veng
Pool F - Hunthar Team A
Pool G - Ramhlun South Team B
Pool H - Bawngkawn Team B

Hei bakah hian qualifying khelh chhung zawnga mimala khel tha ber/hmelma that hnem ber, ‘Most Kill’ lawmman dawngtu iLegendMizolek, Ramhlun South Team B (18 kills) hnenah lawmman Rs. 500/- pek a ni.

Quarter final lut team 80-te hi pool 4-ah then leh niin, anni hian July ni 28 zan atang khan intihsiakna an chhunzawm leh a, intihsiakna hi Zonet cable leh Dawrpui Vengthar YouTube channel chuan zan tin dar 9:00 atangin live-in an pe chhuak thin a. Tournament hi thalai gamer ten an hlut hle a, live-a pek chhuah pawh entu an thahnem thin hle.

Quarter final-ah hian map pathum - Erangel, Vikendi leh Miramar-ahte vawikhat theuh Pool tinin match an khel a, August ni 1 zan khan quarter final hi khelh zawh a ni. Pool Champion bik chauh han tarlang ila:
Pool A - Bawngkawn B
Pool B - Dinthar B
Pool C - Lunglei Lungkawn
Pool D - Lawngtlai College

Anni bakah hian pool tin atanga ti tha zual team 9 zelin semi final an lut bawk a ni.

Semi final-ah hian team 40 an lut a; Pool A (team 20) leh Pool B (team 20) a then an ni. Ni 3.8.2020 (Thawhtanni) zan atanga khelh tan tura ruahmanna engkim peih fel vek a nih tawh laiin, Covid-19 avangin tournament buatsaihna hmun Zonet Studio, Zarkawt chu total lockdown avangin a hman theih loh a, tournament hi chawlh lailawk a ni.

Dawrpui Vengthar eSports chuan tunlai boruakah, zan lama curfew puan a nih bawk avangin thalaite'n esports hmanga intihsiakna tha tak an neih theih ringin he tournament hi an buatsaih a, sawrkar duh dan anga kal khawm ngai loa mahni in lum atanga khelh theih esports tournament lian tak a buatsaih hi thalaite chauh ni lo, nu leh pate pawhin lo hlutsak theuh turin an ngen a ni.

Prize pool - Rs. 1,50,000/-
1st prize - Rs. 70,000/-,
2nd prize - Rs. 30,000/-,
3rd prize - Rs. 10,000/-
Most Kill - Rs. 5,000/-

Hei bakah hian lawmman chi hrang hrang Rs. 35,000/- chuang sem ral a ni dawn bawk a ni.