Mobile game lar chho deuh mai, PlayerUnknown’s Battleground chuan India ramah thawm a nei deuh reng mai a. Tun hnaiah India ram hmun hrang hrangah he game hi an khap chho a, tunah phei chuan a khelh theih hun chhung pawh bituk thlap a ni tawh dawn a ni.
PlayerUnknown’s Battleground (PUBG) mobile siamtu Tencent Games te chuan tun hnai khan India rama PUBG mobile khel thinte tan he game khelh theih hun chhung hi an bituk tan a, ni khatah darkar 6 chauh khelh theih a ni tawh ang a, hemi hma hian darkar 2 leh darkar 4 khelh tlin hunah warning a lang thin dawn a. Hetianga thlak tur hian tlemin hun erawh a la duh deuh dawn niin an sawi.
Thalaite chuan PUBG hi an atchilh chho viau mai a, he game khel thin tam tak chuan chintawk an nei lo chho tial tial bawk a. Hetiang a nih avang hian India ram state thenkhatah chuan khelh an khap phah hial a, Rajkot, Gujarat velah phei chuan tun thla tir lamah khan he game kheltu mi eng emaw zat chu an man nghe nghe a ni.
PUBG atchilhtu mipa pakhat chuan first year pre-university exam a hmachhawn a, a chhannaah he game khelh dan hi a ziak vak mai a, a fail chiang hle a. Nikum khan he zirlai hi SSLC exam-ah distinction-ah a pass thei a, PUBG a khel chho a, a lehkha zir lai chu a ngaihthah phah ta vek niin an sawi.
India ram hmun pakhatah pawh mipa naupang kum 15 mi chuan PUBG hi a atchilh hle a, a thiante chuan an in chhuahsan turin an thlem niin a pa chuan a sawi a, March 11 atang khan a chhungte chuan a awmna chin an la hre leh miah lo niin an sawi bawk a ni.
He mobile game kaihhnawih thilah hian eng eng emaw sawi neuh neuh a tam sawt viau a, a atchilhtute chanchin tha lo tak tak sawi tur a pun belh zel bawk a. Zirlaite chuan an zirlai an ngaihsak loh phah a, hnathawh neite pawhin an hna an thlahthlam a, chhungkaw thenkhatah chuan an chhungkaw boruakin a tuar hle bawk a. Hetiang neuh neuh a awm tak fo avang hian game siamtu lampang chuan hun rei tak tak khelh a nih tawh lohna turin hunbi hi bituk an rilruk phah ta a ni.
Tun hnaiah PUBG kheltu thenkhat chuan Twitter velah an inkhelh laia ‘health reminder’ lang thin chu an screenshot a, an post nual hlawm a. Darkar eng emaw zat an khelh hnua he health reminder lang, khelh chhunzawm thei ta lo pawh an awm nual tawh a ni.
Game khel tura an luh tirhin a kheltu chu kum 18 a tlin leh tlin loh a zawt phawt a, kum zat azirin khelh theih zat darkar pawh hi a inang lo ve thei maithei niin an sawi a. Khelh rei deuh hnua chawlh lailawk a ngaih chuan an khelh leh theih hun tur a hriattir nghal zel a ni.
An game siam chhuah hi India ramah a hlawhtlin rualin thuneitu lamin an khap chho mek bawk si a, hei vang hian Tencent Games te chuan India rama khelh chhunzawm a nih zel theihna turin a rang lama hma lak vat hi an duh ni berin a lang a. Thuneitute rilrem zawnga an chet hian nakinah khap a nihna pawh an hlih phah an beisei tel niin a ngaih theih.