30 May 2020 06:16

inkhel

PUBG hi China ram chhuak a ni em?

India ramah PUBG Mobile kheltu an pung chak a, he game atchilhtu hi an thahnem tawh hle a, tun dinhmunah India ram chhunga mi maktaduai 10 atanga 15 velin an khel thin niin an sawi.

Tun hnaiah khan engineer pakhat Sonam Wangchuk chuan China ram thil siam hrim hrim thlauh thla turin beihpui a thlak a. Hetianga boruak a siam hnuah hian PUBG kheltu tam tak rilru a buai a, PUBG chu Chinese ho siam a nih leh nih lohah an chiang lo a, rilru nuam lo takin an awm mek a ni.

China ram atangin COVID-19 a darh tan tih chu khawvel hriat a ni a, hei vang hian an ram atanga chhuak reng reng thlauh thlak duhna a lian viau mai a, hetiang boruak a awm chhoh takah chuan PUBG kheltute pawhin he game chungchang hi an hriat chian ve a tulna chin te pawh a awm thei dawn a ni.

PUBG hi PUBG Corporation ho siam chhuah niin, anni hi South Korean video game company Bluehole Studio ho peng pakhat an ni a. Tunah chuan brand pakhat angin an awm tawh a, an hming pawh Krafton Game Union tiin an thlak tawh a ni.

Brendan Greene chu PUBG Mobile siam chhuaktu nia sawi niin, 2017 kuma PUBG an tlangzarh tan tirhah khan Greene hi Bluehole Studio-ah creative director a ni a, hei vang hian a siam chhuah nia ngaih a nih phah a ni.

2017 kumah khan China ramah PUBG chu khelh phal a ni lo a, hetiang a nih takah chuan Tencent Holdings hnuaia video games lampang buaipuitu peng pakhat Tencent Games chuan he game hi tlemin an khawih danglam a, China ram chhunga tihdarh theihin an buatsaih a ni.

China ram company lian Tencent Holdings Ltd hian Chinese mipuite’n mobile atanga PUBG an khelh theihna turin he game hi siam danglam an rilruk a, 2018 kum tir lamah khan khawvel pumpuiah mobile atanga khelh theih turin PUBG Mobile chu an tlangzarh zui a ni.

PUBG Mobile tlangzarh a nih tirh atang hian he game ngainatute chuan an lawm nghal hle a, a kheltu pawh an pung chak viau reng a. Tun thlengin khawvel hmun hrang hrangah he game kheltu hi an pun belh zel a ni.

He game kheltute chuan an khelh dawna an hmuh hmasak chu Tencent logo niin, PUBG Corporation logo chu an hmu leh bawk a. Hetiang a nih avang hian he game hi China ram atanga chhuak nia ngaihna a len phah hle a ni.

Tencent Games chuan 2018 kum laihawlah khan Bluehole Studio-ah 10% share an lei a, he game neitu nihna hi an nei ve ta tihna a ni a. 2019 kumah ringawt khan Tencent Games chuan PUBG Mobile atang hian $1.3 billion zet chu an hlawh thei niin an sawi a ni.