10 Jan 2019 05:08

inkhel

PUBG atchilh vangin damdawi inah an dah

Tun hnaia mobile game lar tak PUBG MOBILE khelh nasat vangin Jammu-ah mipa pakhat chu a taksain a tuar a, damdawi ina dah luh a ni.

Thalaite chuan PUBG MOBILE an khel nasa a, a khel tawh vek vek chuan mawng an hun hlek chuan he game hi an kheuh chhuak deuh zel mai a. Mizo thalaite pawhin an buaipui nasa a, veng hrang hrangah he game atchilhtu hi an pun belh ve zel a ni.

Jammu-a fitness trainer pakhat pawhin he game hi a hre thar ve chiah a. A thiante chuan ni 10 kalta khan PUBG MOBILE hi an hmelhriattir a, atchilh nghal hle a. A inkhelh lai hian amah leh amah te chu a inkhawih vak vak a, heianga a tih nasat avang hian a intih nat phah a, damdawi ina luhpui a ngai hial a ni.

Amah enkawltu doctor te chuan a rilru a pangngai chiah rih lo niin an sawi a, mu leh mal a nei lutuk rih lo niin an sawi a. An damlo enkawl chuan hriatna a hloh then nia sawiin, a rilruah PUBG a lian ber a, chu chuan a tibuai vek rih niin an sawi bawk a. Ni eng emaw zat an enkawl hnuah ngai a awh chhoh ve mai an rin thu an sawi.

Doctor te chuan tun tum hi hetiang thil a thlen vawi khatna a nih loh thu an sawi a, naupang eng emaw zat pawh PUBG an buaipui lutuk avanga an buai phah tawh thu an sawi a ni.

“Hetiang deuh hi a hma pawhin eng emaw zat kan hnenah an rawn kal tawh a, damdawi ina dah luh an nih hnuah a tul ang zelin test hrang hrang kan lo neihpui a, kan enkawl hnuah pangngai takin an in lamah kan hawtir leh zel a. An mobile game khelh hi a bulpui pakhat a nih rualin thil dang pawh puh tur a awm teuh thoin kan hria a, a tam zawk chu ngaihsaktu nei lo inti leh an chhungte’n an rilru an hrethiam lo nia ngai te an ni hlawm,” tiin doctor chuan a sawi.

He game atchilhtu an pung chak a, hmun hrang hrangah harsatna hi hrang hrang a awm chho zel bawk a. India ram bikah chuan thalaite zirna a tibuai nasa niin an sawi a, hei vang hian zirna in thenkhat chuan an compound chhunga he game khelh hi an khap hial tawh a ni.

Vellore Institute of Technology chuan PUBG MOBILE khelh hi an khap tawh a, Jammu and Kashmir ah pawh an state chhunga he game hi khelh phal lo turin nu leh pate chuan sorkar hnenah ngenna an thehlut tawh niin an sawi a. China rama Online Gaming Ethics Review Committee pawhin tharum thawhna nasa zual PUBG leh Fortnite te chu an ban tawh niin an sawi.