Dutch club PSV Eindhoven manager Ruud van Nistelrooy chuan banna a thehlut a, tun season-ah PSV hian game khat dang khelh tur la nei mah se, Nistelrooy hi a bang fel nghal a ni.

Tun season chiah Nistelrooy hian PSV hi a enkawl hmana, mahse a enkawlna hnuaiah PSV hian Dutch Cup leh Dutch Super Cup te an chawi a, Dutch top flight league Eredivisie-ah pahnihna dinhmun an luah mek bawk.

Sunday lo awm turah PSV hian tun season-a an game hnuhnung ber an khel dawn a, AZ Alkmaar an tlawh dawn a, he inkhelah hian Fred Rutten chuan PSV hi a enkawl dawn a ni.

PSV chuan Nistelrooy-a ban chungchangah thuchhuah siamin, “Nilaini zing khan head-coach Ruud van Nistelrooy chuan PSV a chhuahsan thu a puang a, club chhunglam thil vawi eng emaw zat sawi ho a ni a, Thawhlehni zan khan Board of Directors leh Van Nistelrooy hian hian meeting an nei leh bawk. Tun Sunday-a AZ kan hmachhawn turah hian rilru pek rih phawta, season zawh huna inbiakna neih leh tura tih a ni.

“Mahse Nilaini zing khan Nistelrooy chuan club atanga thlawpna a dawn that tawk loh avangin awm zel a tum loh thu a sawi a, hemi chungchang hi staff leh player te hnenah pawh a sawifiah nghal. Tun Sunday hian management lamin an ngen angin Fred Rutten chuan head-coach hna a thawk lailawk rih dawn a ni.

“PSV chuan Van Nistelrooy-a thutlukna hi pawi kan ti a, tun season-ah Dutch Cup leh Dutch Super Cup te min chawipui avangin kan lawm a, league-ah pahnihna niin season kan khar a beiseiawm bawk a ni,” tiin an sawi.

Season khat chhungin kum 46 mi Nistelrooy-a hnuaiah PSV hian game 51 khel hmanin, vawi 33 hnehna an chang a, vawi 8 chiah tlawmin, goal 126 lai an khunga, goal 60 an chhuah bawk a ni.