10 Jul 2019 05:37

inkhel

PSG tantute’n Neymar chhuak turin an duh

Neymar chu Paris Saint-Germain tantute thinlungah a tla na lo sawt hle a, tun hnaia ngaihdan an lakah Brazilian forward chu an club atanga chhuak tura duhtu an tam hle.

Paris Saint-Germain tantute chuan tun hnaiah internet kaltlangin ngaihdan an la a, an ngaihdan thawhtute zinga a tam zawk chuan Neymar chu PSG atanga chhuak tura an duh thu an sawi.

PSG tantu zinga ngaihdan thawhtu 79% zette chuan nipui transfer window inhawng mekah hian an forward Neymar chu chhuak turin an duh a. Brazilian star hian tun hnaiah Barcelona lama kir leh a tum niin an sawi ansa hle a, amah pawhin PSG ah chuan khelh a tum tawh loh thu te a sawi chhuak hial tawh a. Hetianga thu chiang lo deuh ri fo chu a reh theih nan PSG tantute chuan chhuak mai se an duh phah a ni.

FC Barcelona president Josep Maria Bartomeu chuan Neymar chungchanga thu thang mekah a tawng chhuak a. Neymar la let leh tur hian hma lak an tum loh thu a sawi chhuak a, tun hnaia thawm a rin viau tawh hnuah pawh engmah a la danglam lo a, hma lak an la tum chuang lo tih a sawi nawn leh bawk.

France Football-in ngaihdan an laka 79% zetin Neymar chu chhuak tura an duh thu an sawi hnuah, Brazilian star hralh chhuah chu PSG chuan an hlawkpui an rin leh rin loh an zawt tel a, he zawhna hi chhangin Neymar hralh chu sumdawnna atan thil tha tak a nih an rin thu an sawi.

Spain rama chanchinbu thenkhat chuan PSG coach Thomas Tuchel pawhin Neymar chu season thar tan hunah a squad-a awm zel atan a duh lo niin an tarlang a. Hetiang thu thang mek hi July 15 hian tih chian a ni tan dawn a, hemi ni atang hian Paris khawpuiah PSG chuan training an nei tan tawh dawn a, Neymar pawh la tel ngei tura ngaih a ni.

Barcelona chuan Neymar hi lak leh theih chu an hnial vak lo a; amaherawhchu, PSG in a man an chhiar ang chuan an lei ngam lo a. Hei vang hian pawisa tlem deuh zawk pein, a manah hian Philippe Coutinho leh Ousmane Dembele te kaltir an phal thung a ni.

Bayern Munich chuan Ousmane Dembele an lo beisei ve mek bawk a, Barcelona-in Neymar an la thei a nih phei chuan French winger chu lak theih mai an inbeisei thu an sawi a ni.