Manchester United forward Marcus Rashford chu nipuia free agent ni thei dinhmuna a din lai mekin PSG chuan an ngaihven a, PSG president Nasser Al-Khelaifi chuan Rashford-a agent an biak thu leh a free-a lak luh an duh thu December thla khan a lo sawi tawh.
Mahse a contract kal lai pawhsei lam an awn leh zawk avangin foreign club lam hian Rashford chung changah inbiakna an kal thuipui ta lo. Club nen inremsiamna thar buaipuiin tunah hian Rashford leh club inkarah inbiakna an kalpui mek niin a lang.
Rashford hian a vanglai a tawng chho mek. United tana a game khelh hnuhnung 9-ah goal 9 a khung a, a khung chho zel pawh Ten Hag chuan a beisei.
"Kan player-te zawng zawng hian ngaihventu nei vek se ka ti, hna tha tak kan thawk tihna a ni a, kan team hian kan khel tha tihna a ni, kan tum ber a ni bawk. Mahse helai hmun hi an tan hmun tha ber a ni. Team tha ber duan chhuah kan tum," tiin Ten Hag chuan a sawi.
Rashford-a contract chung changah inbiakna kalpui mek a la ni em? tih zawhna chu, "Club leh player-te inkara inbiakna chu thuruk a ni. Manchester United hi a club a ni tih a hriatthiam ka beisei. Helai hmunah hian a khel tha berin ka hria.
"Hma a sawn chak a, tha pawh a seng hnem. Ruahmanna pawh a nei tha thawkhat bawk. He team-ah hian a theihna a phochhuak tha a, goal a khung theih nan he team hian an pui thei bawk. Kan tana a pawimawh zia hi a hriat kan ring a, hlawhtlin kan duh chuan kan mamawh a, kan bula awm turin kan duh," tiin Ten Hag chuan a chhang.
Rashford-a attacker pui Anthony Martial chuan a inhliam avangin tun season-ah Manchester United tan game 13 chauh a la khel a, Carabao Cup Semi final first leg-ah pawh a inlan thei dawn lo.
"Inhliam reng a ni lo. Game a khel ve a, theihtawp chhuaha hun remchang ngah ve deuh tur a nih laiin engmah tihtheih a nei lo. Vanduaina a nih chang pawh a awm.
"A chang chuan a chhan leh vang hi hriatthiam a har thin. Mahse a remchan chuan kan tan a tangkai lutuk a, a khelh pawh kan khel tha thin. Hlawhtlin kan duh chuan kan mamawh a, mahse a remchan hmasak a ngai," tiin Ten Hag chuan Anthony Martial chungchang a sawi a ni.