PSG a chhuahsan chiah a, Paris club chuan Champions League no mawi an chawi. Kylian Mbappe chuan a chhuah avangin inchhirna a neih loh thu a sawi bakah, PSG lakah rilru chhia a put loh thu a sawi bawk.

PSG-a kum 7 hun a hman chhungin Mbappe hian Ligue 1 title 6 a la a, Champions League erawh a chawi lo thung. Nikum June thla khan PSG chhuahsanin Real Madrid a pan a, European champion vawi 15 ni thei lakah beiseina sang tak a neih laiin, season liamta UCL-ah khan quarter-finals ah Arsenal chuan 5-1(agg) in an hneh a nih kha.

Hetih lai hian PSG chuan final-ah 5-0 ngawtin Inter Milan an sawp a, a vawi khat nan Champions League no mawi an chawi. "PSG ka chhuahsan hma mah mah niin an ngai a, mahse a hun takah ka chhuahsan e," tiin Mbappe chuan Nations League third-place an khelh dawnin a sawi.

Mbappe hian UCL final vawi 1 a khel tawh a, kum 2020 khan Bayern Munich lakah si khat faiin an tlawm. Chumi hnuah semi-final an lut leh a, Manchester City an hneh lo. Khami hnu khan final luh a nei tawh lo a ni.

"PSG-a ka thawnthu chu a zo tawh e, ka chhuak kha inchhirna ka nei lo a, PSG lakah hian rilru chhia ka pu ngai lo bawk.

"UCL-a an champion avangin ka lawmpui a, champion an phu a ni. Harsatna tam tak an tawk ve, harsatna an tawh laiin kei pawh ka tel ve alawm.

"Europe-a team tha ber an ni a, 100 percent-in champion an phu. Tunah chuan tu pawhin PSG hneh an chak tawh dawn a ni," tiin Mbappe chuan a sawi.

A season hmasa berah Mbappe chu La Liga top scorer ni mah se, Real Madrid chu trophy a chawipui zo lo. An hmelma Barcelona an ngam lo hle a, El Clasico-ah an hneh lo vek nghe nghe.