Champions League group C inkhelah French club lian Paris Saint-Germain chuan Premier League team kal tluang Liverpool chu Parc des Princes-ah an lo mikhuala, mual neitu lam hi 2-1 in an chak.
PSG player Juan Bernat chuan goal a khung hmasa ber a, Neymar chuan PSG tan thun belhin half time hma chiahin Liverpool tan James Milner chuan penalty spot atangin a pet goal ve bawk.
Khelh ngaah PSG hian point riat hlawhchhuak tawhin pahnihnaah an awm a, group C hmahruaitu Napoli chu point khatin an pha lo. Liverpool hian khelh ngaah point ruk hlawhchhuak tawhin pathumnaah an awm ve thung. Group C inkhel dangah Napoli chuan Red Star belgrade an hneh ve bawk avangin Liverpool hian round of 16 lut turin group stage game hnuhnung berah an chak ngei ngei a ngai a ni.
PSG 2-1 Liverpool
(Bernat 13’, Neymar 37’) (Milner 45+1’ pen)
PLAYER RATINGS
PSG: Buffon 6, Kehrer 6, Thiago Silva 7, Kimpembe 5, Bernat 7, Verratti 8, Marquinhos 6, Mbappe 7, Neymar 7, Di Maria 6, Cavani 5. Subs: Alves 6, Choupo-Moting 6, Rabiot 6.
Liverpool: Alisson 7, Gomez 5, Lovren 5, Van Dijk 5, Robertson 5, Milner 6, Henderson 4, Wijnaldum 4, Salah 4, Firmino 5, Mane 5. Subs: Shaqiri 6, Keita 6, Sturridge 6.
Match Report
Team hnihte inkhel a hmuhnawm nghal a, inkhel tan atanga minuter ruknaah PSG lamin hun tha nei nghalin, box pawn chiah veilam atangin Angel Di Maria chuan goal-ah a pet a, Liverpool goalkeeper Aisson chuan a lo save. Minute sawm chuang hret a ralin, mual neitu PSG lamin hma an hruai a, hmatawg lamah player manto tak tak Neymar leh Kylian Mbappe-te nei mahse goal khungtu hi left back Juan Bernat a ni. PSG hian Liverpool nawr pheiin nalh takin ball an in pass a, box chhunga tlan lut Mbappe pek niin, Mbappe hian lei hrulah ball cross lut ve lehin Liverpool lamin an lo dang per a, hemi hi Bernat chuan lo changin, ani hian a ke dinglamin a pet a, Alisson-a rin loh lamah a kal avangin Alisson-a’n en mai loh chu tihtheih a nei lova goal-ah a lut.
Darkar chanve khelh a nihin PSG an hlauhawm lehpek hle a, Neymar chuan ball khalhin Liverpool box veilama tlan Mbappe a pe thla a, Mbappe hian lei hrulah cross lutin Alisson hian a lo man a, Alisson hian man hman lo se chu Cavani-a’n a pet goal ngei a rinawm. 37mins-ah PSG-in an goal hnihna an khunga, counter attack-ah Neymar leh Mbappe an hlauhawmin an khel a mawi thin hle a, anmahni half atanga ball inpe in, Mbappe chuan ball a tlan pui a, Neymar pe lehin Neymar hian box-a tlan lut Mbappe a pe a, Mbappe hian lei hrulah cross lutin Cavani chuan lo pet mahse Alisson-a’n a save a, Alisson hian ball a man lova, ball a save per chu khawvela footballer manto ber Neymar chuan goal-ah a khung zui ta a ni.
Half time hma lawkin Liverpool-in goal an khung ve a, James Milner chuan penalty spot atangin a chhuih lut. Liverpool lam hian PSG nawrin Mane chuan box chhungah ball khalh luh a tum chu Di Maria chuan a titlu a, Liverpool lam hi penalty beseia an au laiin referee chuan engmah a pe lo. Corner pet tura ngaih an ni hmana, mahse goal line referee chuan Di Maria-a’n Mane a tih tluk dan hi foul ni ngei a hriat avangin PSG lamin penalty an chawi a, sawilan tawh angin Milner chuan penalty spot atangin a khunga, first half hi 2-1 in tihtawp a ni.
Second half tan a ni a, PSG in goal an khung emaw an ti nghal. Free kick atanga ball vawrh luh chu Marquinhos chuan a lo tauh luta, mahse off-side niin goal-ah chhiar a ni lo. Second half-ah first half aiin Liverpool an hlauhawm a, hun tha pawh an insiam nual. 70mins-ah PSG-in an goal thumna an khung teuh hle a, corner atangin Neymar chuan ball vawrh lutin Marquinhos chuan tha takin goal-ah a lo tauh a, mahse Alisson chuan a aia thain a lo save avangin a goal lo.
80mins-ah Neymar chuan Liverpool box chhungah ball a khalha, Van Dijk chuan Neymar hi titluin, PSG hian penalty beisei viau mahse referee-in penalty pekna tlakah a ngai lo. Hemi hnu lawk hian PSG-in Liverpool an nawr leha, Mbappe chuan ball tlanpuiin box chhung veilam atangin pet mahse goal zawnah a pet lo. Team hnihten minute 90 chhungin inkhel hmuhnawm tak min hlui tluan a, mit a tlai hle. Injury time-ah Neymar chuan free kick atangin ball a pet a, hla mahse a pet tha tha hle a, Alisson a chhaih buai hle. Inkhel a tangin a hmuhnawm hle a, second half-ah goal luh belh tawh lovin inkhel hi 2-1 in a tawp a ni.