Paris Saint-Germain chuan an manager Mauricio Pochettino-a contract chu kum khat dangin an pawhsei saka, Pochettino-a contract thar hian kum 2023 June thla thleng a daih.

PSG hian Thomas Tuchel an ban hnuah Argentinian manager Pochettino hi kumin January thla khan an laluta, thla 18 daih contract ziahpuiin, kum khat danga pawh sei theihna an nei bawka, hei hi an hmang tangkai.

Pochettino hi season liamta a zawh hnu lawk khan Real Madrid leh a club hlui Tottenham nen sawi zawm an ni nghala, mahse PSG hi a la enkawl zel rih dawn.

Pochettino hian season liamta khan PSG hi Ligue 1-ah champion pui lo mahse French Cup a chawipui bakah UEFA Champions League semi-final a thlenpui bawka, PSG hian an captain pawh lo ni tawh thin Pochettino chungah hian rinna nghatin, an contract an pawt sei ta a ni.

Kum 49 mi Pochettino chuan a contract pawh sei a nih chungchang sawiin, “Ka contract pawh sei a ni hi ka lawm hle a, ka staff te tan pawh thil lawmawm tak a ni. Club-in min ring tawk a ni tih hriat hi kan tan a pawimawh takzeta, PSG tan hian kan theihtawp kan chhuah zel dawn a ni.

“Kan tum ram thlen tumin theihtawp kan chhuah dawna, kum 20 kalta khan he club captain hi ka ni a, tunah an manager ka ni a, ka mangram a taka lo thleng a ni,” a ti.