Kylian Mbappé chuan Monaco atangin loan-in PSG a zawm ta a, he an inremnaah hian PSG chuan Mbappe hi nipui bazar lo inhawn leh hmasak berah an lei thei ang a, kum 4 daih contract an ziahpui thei dawn a ni.

Paris Saint-Germain hian tun nipui bazarah kan £198m velin Neymar an lei a, Monaco rawlthar Mbappe hi an lei leh a nih chuan UEFA Financial Fair Play Rules an bawhchhe dawn, chuvang chuan loan-in an la ta a ni.

Tun season a zawh hun transfer window a inhawn leh hmasak berah PSG chuan £162m-in Mbappe hi an lei dawn niin Mirror chuan a tarlang.

Ni hnih liamta khan Mbappe hian France National team training neihna hmun Clairefontaine-ah PSG zawm tura medical a tihfel thu French broadcaster TF1 chuan a tarlang a. Kum 18 mi French striker hi Real Madrid, Barcelona leh Manchester City te chuan lei tumin dawr mahse a seilenna Paris lama khawsak a thlang ta zawk a ni.

Kum 18 mi lek ni mahse Monaco tan game 44 khel tawhin goal 26 a khung a, assist vawi 11 lai a nei tawh bawk. Ligue 1-ah a che tha hle a, Europe-ah pawh a that zia season liamta khan an lantir a, Real Madrid boss Zidane chuan kum 15 mi lek a nih lai atanga a player duh a nih thu a sawi nghe nghe.

"Paris Saint-Germain ka zawm thei hi ka hlimin ka inchhuang hle a ni. Paris leh a chhehvela naupangte chak ber chu a sen leh a pawl jersey hak a ni a, Parc des Princes boruak ropui tak hnuaia inkhelh hi kan chak ber thin.

"He club project-a tel ve hi ka chak em em a, PSG hi Europe club zinga hmasawn tum ber club an ni. Ka team-mate tharte kianga hmasawn zel ka duh a. Tin, ka team thar tana hlawhtlinna thawhchhuah chu ka tum ber a ni bawk," tiin Mbappe chuan PSG a zawm chhan a sawi.