Paris Saint-Germain chuan nipui transfer window inhawn hunah Manchester United atangin Marcus Rashford chu lak luh an tum dawn niin an sawi.

Ligue 1 champion Paris Saint-Germain boss Thomas Tuchel chuan tlar hma lam tihchakna atan England striker Marcus Rashford chu a duh niin an sawi a. Nipui transfer window inhawn hunah PSG hian £100 million vel bawrin Rashford hi lak luh an tum dawn niin an sawi a ni.

Marcus Rashford hi tun season chhungin a che tha chho hle a, khelmual chhungah a chet that viau rualin khelmual pawn lamah pawh boruak a nei tha em em bawk a. COVID-19 buaina karah UK sorkar hriat thamin thil tha a ti a. Khelmual chhungah lah goal a thun chho ve deuh reng bawk a ni.

Tun season kal mekah Rashford hian inelna hrang hrangah Manchester United tan goal 21 chu a thun tawh a, a goal thun hnuhnun ber chu Southampton nen Old Trafford-a 2-2 a an inhnehtawk khan a ni.

PSG boss Thomas Tuchel chuan Marcus Rashford chu a duh hle a, nipui transfer window inhawn hunah pawh lak luh atana a duh hmasak ber niin Independent chuan an tar lang.

Independent chanchinbu chuan German head coach chu Parc des Princes lama thuneitute nen an inbe fel tan tawh niin an tar lang a, Rashford leina tur pawh pawisa tam tham tak a sawi chhuak tawh niin an tar lang bawk a ni.

Manchester United thuneitute chuan an academy atanga an hrual chhuah chu man tlawm taka an chhuahtir a rinawm vak lo hle a, hei vang hian £100 million aia tlawm chuan hralh an remtih a rinawm lo hle a. Hetiang hi ni mah se PSG chuan United-in an chhiar anga Rashford chu lei an inhuam niin Independent chuan an tar lang a ni.

French club lian chuan an striker Kylian Mbappe chu rei tak kawl theih an beisei lo tan niin thenkhat chuan an sawi a, tun hnaiah hian France forward chu Real Madrid nen an sawi zawm nasa hle a. Mbappe hi hmun dangah a kal ta a nih pawha a hmun ruak luah zo tur an melh nghal a, hetiang atan hian Rashford hi a tling zo ber niin an ngai a ni.