​PSG-in Koulibaly an duh

20th January 2020, 04:01PM

French club hausa Paris Saint-Germain chuan Napoli defender Kalidou Koulibaly chu an hmu tai hle niin chanchinbu mite chuan an tarlanga, lakluh an tum dawn nia tarlan tel a ni.

PSG hian Koulibaly hi an lalut thei a nih ngat chuan hlawh pawh pek san an inhuam viau nia tarlan niin Koulibaly hi kum khata pound maktaduai 10 chuang hlawh tura Paris-a thlem luh an tum mek niin tarlan a ni.

PSG centre-back Thiago Silva chu a lo upa chho ve tawha, PSG hian centre-back thar mamawh chho mekin Senegalese defender kum 28 mi Koulibaly chu an mamawh chhannaah an ngai niin a lang meka, a man erawh tlawm dawn lovin pound maktaduai 70 chho vel tal chu PSG hian sen an inhuam a ngaih a rinawm.

Koulibaly hi Europe-a team lian te chuan lakluh an lo tum fo tawh thina, mahse vawiin thlengin Napoli player a la ni. Kum 28 mi lakluh tum tu zingah Manchester United, Chelsea, Arsenal, Barcelona leh Real Madrid-te hming pawh a langsar viau thina, mahse Koulibaly hian Naples a la chhuahsan lo fo.

Koulibaly hi French club Metz academy lamah a awm thina, kum 2012 thleng Metz tana a khelh hnuah Genk zawmin, kum 2014 khan Napoli chuan an laluta, tunah hian Napoli tlar hnung innghahna a ni meka, tunlai centre-back zinga tha ber pawla ngaih a ni bawk.

Kum 2014-a Napoli a zawm tirhin Koulibaly hian Supercoppe Italiana a chawi nghala, vawi li ngawt Serie A Team of the Year-ah tel tawhin, season hmasa khan Serie A Best Defender-a thlan a ni bawk a ni.

Copyright © inkhel.com 2024. All rights reserved.