22 May 2020 10:00

bakteaJr.

Mizo tlangval

​PSG-in Icardi lek ngheh an tum

French club hausa Paris Saint-Germain chuan loan-a Inter Milan striker an kawl mek Mauro Icardi chu lei ngheh ngei an tum meka, a manah pound maktaduai 44.7 (euro maktaduai 50) an thehchhuak niin Sky Sports chuan a tarlang.

PSG hian Icardi manah hian pound maktaduai 44.7 bakah hian add-ons ah Inter hi pound maktaduai 8.9 (euro maktaduai 10) pek an la inhuam bawk niin tarlan tel a ni.

PSG hian nikum nipui khan Argentine striker Icardi hi loan-in an laluta, Inter nen an inremnaah hian an duh chuan PSG hian Icardi hi tun season zawh hian pound maktaduai 62.7 (euro maktaduai 70)-in an lei theia, mahse hemi aia tlawmin PSG hian lei an tum mek.

Nikum September thlaa PSG a zawm hnuah kum 27 mi Icardi hi a che chhe lo hle a, PSG tan competition zawng zawngah game 28 khel tawhin, goal 20 a khung tling tawh.

Icardi hian Inter Milan-ah kum 2022 thleng contract a la neia, PSG a zawm hma lawk hian Inter hian kum thum daih contract thar an ziahpui.

PSG striker Edinson Cavani chuan June ni 30-ah a contract a hmang zo dawna, PSG nen contract thar chungchangah inremna an la neih loh avangin a thlawna chhuak mai thei dinhmunah a awm meka, Inter Milan chuan Cavani hi a thlawna lakluh ngei an tum thu Sky Italia chuan a lo tarlang ve tawh bawk a ni.