22 May 2020 05:56

inkhel

PSG-in Aubameyang lei an tum

Paris Saint-Germain chuan nipui transfer window inhawn hunah Arsenal atanga Pierre-Emerick Aubameyang lak chhuah an tum dawn.

Pierre-Emerick Aubameyang chuan 2018 atangin Arsenal a zawm tan a, Emirates Stadium lama a insuan luh hnuah hian game 97 a khel tawh a, hengah hian goal 61 zet chu a thun tling tawh a ni.

Gabon striker Aubameyang hian kum khat chauh contract ziah sa a nei tawh a, Arsenal thuneitute chuan contract thar ziahpui dan an ngaihtuah tawh a, hetih rual hian Auba chuan Emirates Stadium lama thuthlung ziah leh hi a la sawi ri rih lo a ni.

A dinhmun thlir chungin Ligue 1 champion Paris Saint-Germain chuan kum 30-a upa Aubameyang chu an lo ngaichang reng a. Nipui transfer window inhawn hunah chuan Arsenal striker hi £36 million atanga £45 million bawr vel chuan lei theih mai an beisei a ni.

French champion Paris Saint-Germain hian tlar hma lam tihchak dan kawng an dap mek a, Mauro Icardi aiawh tur zawn hmuh ngei an duh niin an sawi a. Chutiang atan chuan Aubameyang chu an melh hmasak ber niin an sawi a ni.

Tun season chhungin PSG chuan Inter Milan atangin Mauro Icardi an hawh a, Argentine forward hian game 31 khelhah goal 20 chu a thun tling hman a, hetih rual hian May 31 thleng chauh an hawh thei dawn a, Icardi hi a nghetin an la thei chiah si lo a ni.

Emirates Stadium lamah Aubameyang chu a che chhe lo hle a, season liam taah khan Premier League huang chhunga goal thun hnem ber a ni nghe nghe a. Chutih rualin a beisei anga an club an chet that theih loh thin avangin hmun dang pan mai hi a duh ve tawh a ni.

Arsenal chuan season thum chhung chu UEFA Champions League an khel thei tawh lo a, tun season kal mekah pawh Premier League club chungnung pali zinga tel theih a beiseiawm tawh lo hle a, hei vang hian season tharah pawh Champions League chu an khelh theih a rinawm vak lo hle a ni.

Aubameyang hi Paris Saint-Germain chauh lo pawhin an ngaihven mek a, Barcelona chu sawi rik nasat pawl niin, Inter Milan pawh an sawi rik zingah hian an tel bawk a ni.