PSG in a rang lama Neymar chhuahtir an duh
Paris Saint Germain chuan Neymar chu a hma thei ang bera chhuahtir an duh niin Italy rama chanchinbu lar pakhat Tuttosport chuan an tarlang.
Brazilian forward Neymar chu Paris khawpui chhuahsan tur angin an sawi nasa hle a, nipui transfer window inhawn chhung khan club danga kal tur ang deuha sawi hi a nasa lehzual a. Hetianga thu thang a awm chhoh reng avang hian Paris Saint-Germain lam pawhin an ning ta deuh a, chhuahtir mai hi an hreh tawh lo a nih hmel hle.
PSG director of football Leonardo Nascimento de Araújo chuan Neymar chungchanga thu thang awm reng mai leh Brazilian forward rilru nghet tawh lo lutuk chu a duhtawk tawh viau niin Tuttosport chuan an tarlang a. A rang thei ang bera an club atanga chhuahtir a duh a, chutiang tur chuan January thlaa transfer window inhawn hun an nghak a ni.
Kum 27-a upa Neymar hian a club hlui FC Barcelona lama kir leh a chak thu a sawi chhuah mai bakah, PSG tan chuan vawi khat mah khelh a tum tawh loh thu te a sawi chhuak hman a. Barcelona pawhin an player hlui chu lak kir an hreh lo a, Real Madrid pawhin Neymar lak luh dan kawng hi an lo dap ve bawk a ni.
Transfer window inkhar thleng khan Spanish club lian pahnihte hian Neymar chu tih tak takin an dawr ta chiah lo a, hei vang hian PSG forward chuan Parc des Princes chu a chhuahsan ta rih lo a ni.
Sawi neuh neuh a tam a, transfer window inhawn chhung khan Barcelona chuan PSG chu Neymar chungchangah hian an dawr ve reng a, club pahnihte hi an inrem thei ta rih lo a. Hetiang hi an inkar boruak ni mah se, nakin zelah indawr zui zel an la tum hle niin an sawi.
Neymar-a pa chuan Paris Saint-Germain leh Barcelona te chu an la indawr chho zel dawn niin a sawi a, la inrem thei rih lo mah se an la duhtawk mai bik lo niin a sawi chhuak.
“Club pahnihte hi tunah inrem thei rih lo mah se an la indawr chho zel dawn a. Brazilian ho hi chuan kan hlimna hmuna awm zel hi kan duh mai a, Neymar pawh hi Barcelona-ah khan a hlim ber a. A thiante chuan kir leh tur hian an duh hle a, amah pawhin a aia duh hi a nei bik lo a ni,” tiin a pa chuan a sawi.
