Zanin hian Newcastle United chuan Champions League Group Stage match-ah PSG an tlawh dawn, Newcastle United supporter thenkhat te chu thawhtanni khan Paris an thleng tawh.

Thawhtanni zan khan PSG Ultras nia hriat te chuan Magpies supporter te an bei chiam mai. Pub-ah Newcastle United supporter te hian zu an in a, hetih lai hian PSG Ultras a dum veka inthuam te chuan English supporter te hi an bei thut.

Chair te an vawm darh a, zu no te a leng chuai chuai, darthlalang te pawh a keh nual nia report a ni. Newcastle United Supporters Club Social Media chuan, "Paris-ah him takin awm ru, awm khawm ula, kan lam te kha in ngaichang tawn bawk ila," tiin an tarlang.

French journalist Julien Laurens pawhin he thil thleng hi pawi a tih thu a sawi a, zanin match-ah hian mipui himna tiderthawng thei thil a thlen a hlauh avangin UEFA chu venhimna lam khauh zawka kalpui turin a phut.