PSG chu ka zawm miah lo ang: Hazard

28th November 2018, 03:11AM

Eden Hazard chuan Chelsea a chhuahsan a nih pawhin Ligue 1 champion Paris Saint-Germain chu zawm a tum loh thu a sawi.

Belgian star Eden Hazard hian 2012 khan French club Lille atangin Chelsea a zawm a, Stamford Bridge a lo chhuahsan ta a nih pawhin France ram lama kir leh chu a rilruk loh thu a sawi a ni.

Tun hnaiah Hazard hi Stamford Bridge chhuahsan dawn hnai angin an sawi nasa hle a, mahse hmanni deuh khan Hazard hian January thlaah chuan Chelsea chhuahsan a tum rih loh thu a sawi a. Nipui transfer window a inhawn hunah erawh chuan chhuah chungchang hi a ngaihtuah tur thu a sawi.

Hazard hian thla 18 daih contract a la nei a, Blues nen an inremna chu 2020 nipui hunah a tawp dawn a. 2012 khan Chelsea chuan Hazard hi £32 million in Stamford Bridge-ah an seng lut a, a hun lai kha chuan Chelsea player man to ber dawttu a ni.

Tun hnaia an kawmnaah Hazard chuan, “January thlaa chhuah chu ka ngaihtuahnaah a awm miah lo a, club leh fans te pawh an zahawm hrim hrim a. Ka contract hi kum khat chuang vel a la ni a, ka pawh sei belh loh chuan hmun dang panna tur zawn a ngai dawn a ni,” a ti.

“Stamford Bridge ka chhuahsan dawn a nih pawhin Paris Saint-Germain zawm chu ka tum lo khawp mai a. A hmain PSG hian min rawn be ve tawh a, mahse min thlem chhuah hmel loh khawp mai a. France rama kir leh hi ka duh vak lo a, ka kir leh ta a nih pawhin Lille ka zawm ka ring,” a ti bawk.

A sawi zelnaah, “Tunah tak hi chuan helsea chiah ka rilruah a awm a, kum tharah chuan ka boruak pawh a dang tawh maithei a, rilru sukthlek dan a inthlak hman thei ve tawh a. Tun dinhmunah chuan ka khelhna club tan ka inpumpek rih a ni,” a ti.

Copyright © inkhel.com 2024. All rights reserved.