Transfer bazara chanchin nei ve ta deuh reng Neymar dinhmun a chiang lo zel a, club dang zawm a rilruk mek niin ESPN chuan an ziak.
Brazilian forward hi club hrang hrangin an be tawh niin sawi a tam hle a, PSG-in chhuahtir an pawi ti lo tih a hriat avangin club dang pan a duh. Chelsea neitupa Todd Boehly chuan boruak siam nan kum 30 mi a duh niin ziak a tam hle a, an manager thar tur thutluknaah an innghah a rinawm thung.
Brazil tana a khelhpui Thiago Silva chuan a khelh mekna club Chelsea-a lut turin a duh tih a sawi tawh a, Barcelona forward hlui nen hian Stamford Bridge-a khelh ho a chak. Neymar agent Pini Zahavi chuan club pathum vel bak a be rih lo niin thuthang a awm a, Santos forward hlui hian a hlawh hnem em avangin lalut ngam an tam lo.
2021 khan 2025 thleng daih tur contract thar a ziak a, Ligue 1 club hian kum khatah €43m vel an pe. Paris club hian player lar ringawt buaipui tawh lova team din an tum niin sawi a awm a, an hmathlirah hian Kylian Mbappe a pawimawh dawn hle niin a lang.
Neymar hian 2017 khan khawvela footballer manto ber (€222m) ni turin PSG hi a zawm a, kum nga a awm tawh chhungin hlim leh hlim lo karah a cheng reng niin ṭhenkhat chuan an ziak. Chanchin neuh neuh nei reng mahse Ligue 1-ah vawi li a champion pui tawh a, an duhber Champions League erawh an chawi thei lo. 2020 khan final lutin Bayern Munich an ngam lova, tun season-ah pawh Round of 16 bak an thleng zo lo.
London lamin thawm an neih len viau lai hian a club hlui Barcelona pawh an lang a, Camp Nou-a an kawl tawh ṭhin hi laklet leh an hnial lo niin Spanish chanchinbute chuan an ziak. Barca manager Xavi Hernandez pawhin club duhdan hi pawmin enkawl a chak tih thawm a awm ve mek.
Spanish chanchinbumi Jose Alvarez chuan Brazil forward hi €50m man vel ni turin a sawi a, tunlai angah chuan to lutuk nilo mahse a hlawh hnem em avangin club nazawng tan chawm zawh chi a ni lo. Chelsea bakah hian Newcastle United pawh sawirik anni a, amah zawk hian St James' Park zawm a duh lo niin an sawi.
Club dang zawm ta pawh nise Neymar hian Paris-ah sulhnu ṭha tak a hnutchhiah dawn a, PSG tan hian game 173 khelin goal 118 a khung tawh a, a ṭhiante pet goal tur pawh vawi 77 a siamsak tawh bawk. Nomawi pawh vawi 12 lai a chawipui tawh a, 2015 khan Ligue 1 Player of the Year atan thlan a ni.