Ligue-1 lamah pawh champion an awm ve leh ta a, champion hi tu dang ni lovin Paris Saint-Germain an ni a, Lille chuan PSG inkhelh ve hmain Toulouse an inhnehtawkpui avangin PSG hi an lo champion tawh a, champion an nih hnua an game hmasa berah PSG hian Monaco chu 3-1 in an hneh.
An league game hnuhnung pathumah PSG hi an chak hleithei lova, vawi hnh tlawmin vawi khat an tumpuite an inhnehtawkpui. PSG hian an jersey hnungah player-te hming chuan tir lovin, ‘Notre-Dame’ tih an ziaka, an kawr hmaah Notre-Dame lem a chuang bawk. Hei hi kar liamtaa Paris khawpuia biakin Notre-Dame kang hriat reng nana an tih a ni.
PSG tan hian Kylian Mbappe chuan hattrick a siam a, Russian midfielder Aleksandr Golovin chuan Monaco tan goal khat a khung ve bawk. PSG hi season liamta pasarih chhungin vawi ruk an champion thei a, Ligue 1-ah hian anni aia champion hnem chu St. Etienne leh Marseille chiah an awm a ni.
PSG hian khelh 33-ah point 84 an hlawhchhuak tawh a, vawi 27 hnehna chang tawhin, vawi thum ve ve an tlawmin a tumpuite an inhnehtawkpui tawh bawk. Monaco hi PSG elpha thin ber ni mahse tun season-ah erawh eng an ni lova, khelh 33-ah point 32 chiah la hlawhchhuakin, 16-naah an awm mek a ni.
PSG hian 3-4-3 formation an hmanga, Areola chu si ban nghah tir niin defence-ah Kehrer, Marquinhos leh Kimpembe-te awmin wing-back ah Kurzawa leh Dagba-te dah an ni. Midfield-ah Paredes leh Marco Verratti-te awmin, Mbappe chu hmatawngah maltlat tir a ni a, a sirah Diaby leh Dani Alves-ten an thlawp.
Monaco hian 4-4-1-1 formation an hmanga, Subasic chuan goal vengin, defence-ah Henrichs, Glik, Badiashile leh Toure-te dah an ni. Midfield-ah Siva leh Jemerson awmin a sirah Gelson Martins leh Lopes an tlana, hmatawngah Radamel Falcao maltlat tir niin a hnung chiahah Golovin-a’n a thlawp.
Inkhel tan atanga minute 15-naah Mbappe hian a goal hmasa ber a khunga, Diaby chuan Mbappe inpawt hmu in, ball tha tak a pe a, Mbappe hian goal-ah chantirin PSG hma a hruaipui. Half time hma deuhin Mbappe hian goal a khung belh leh a, Alves nen in one-two in Mbappe hian a goal hnihna a khung zui leh.
Darkar khat khelh a nih hma deuhin Mbappe chuan a goal thumna leh tun season-a a league goal 30-na a khung. Minute 80-naah Golovin chuan Monaco tan goal khat a khung ve a, Vinicius-a pass chu Golovin hian goal-ah lo chantirin inkhel hi 3-1 in a tawp ta a ni.