Thomas Tuchel chuan Brazilian star Neymar chu Paris Saint-Germain ah a hlim zel tih thu sawiin, Paris khawpuiah team khaidingtu nih a duh niin a sawi.

Tun hnaiah Neymar chu Barcelona lama kir leh tur anga sawi a ni a, he thuthang hi a reh thei lo hle a. 2017 khan Neymar hian Spanish club lian Barcelona atangin French club lian PSG hi €222 million zetin a zawm a, khawvela player man to ber a nih phah a ni.

Paris khawpui a pan hnu hian Neymar chu hmun danga kal leh tur angin an sawi deuh reng mai a, nikum khan Juventus pana Cristiano Ronaldo a chhuah hnuah a hmun ruak luah tur angin Neymar hi an sawi zui a, mahse engmah chu a thleng ta rih lo a. Tunah chuan a khelhna thin Barcelona nen an sawi zawm leh mek a, he thawm hi a la dai mai rih lo a ni.

Neymar hi Barca in an thlithlai nia an sawi bakah, amah ber hian Camp Nou lama let leh chu a hreh lo nia an sawi bawk avangin Thomas Tuchel chuan Neymar hi a chhuah tak tak mai a hlauthawng deuh a. Thawm a reh theih loh em avangin Neymar hi chelh beh zel theih dan a ngaihtuah ve mek bawk a ni.

Tuchel chuan, “Neymar hi kan hnenah a hlim rih em em a, amah hi mi puitling a ni a, rilru zau tak a pu bawk a. Khelmualah te leh pawn lamah te, dressing room thlengin a boruak a tha hle a, chet pawh a che tha reng bawk a ni,” a ti a.

“Helai hmuna a thil tihah hian kan lung a awi hle a, a awm danah hian PSG a hotu dinhmuna ding thei tur chi a ni a, chu chu amah pawh hian a duh ka ring a. Amah hi khawvela player tha berte zinga mi a ni a, team kaihruaitu atan pawh duhthusam a ni,” a ti bawk.

A sawi zelnaah, “Neymar hi ka bia ang a, game zawng zawng a khelh vek hi thil tha a nih leh nih loh te kan sawi dun a ngai a. Pontivy lakah a rawn inlan leh tan a, a che chhe lem lo hle a. Pathiannia inkhelah khan khelh tluanchhuah a duh a, mahse kan khek khal ve deuh te a tul avangin a khel tluan ta lo a. Ka duhthusam ang ngawr ngawr chu ni dawn se Neymar hian game zawng zawng a khel ziah ang a, a khel tluanchhuak ziah ang,” a ti.