TATA SK 712 Pro Volleyball League khelh mekah June ni 15, 2023 - Ningani zan khan khan Tuichangral chuan 3-2 a Durtlang North (20-25, 25-23, 18-25, 26-24, 15-12) hnehin asang pali zingah an in hlang kai. He inkhelah hian D3 Business Player of the Match-ah Anup D Costa (Durtlang North) chu thlan a ni. A umtu zawk ni chungin Tuichangralin Durtlang North tan hnuhma chhia an hnutchhiah belh a, Tata SK 712 Pro Volleyball League-ah 3-2-in an hneh.
R Dengṭhuama Indoor Stadium, Mualpuiah Tuichangralin paukhauh takin an khel a, an mamawh hnehna changin 20-25, 25-23, 18-25, 26-24, 15-12-in an chak. Lalhmunmawia (Mapuia) chuan point 22 hmuin ṭum nga a hloh a, Vinod Khatkar chuan vawi 25 vaw tlain point 11 a paih ve thung. League kal meka vawi thum an khelhah a ṭum khat nan Tuichangral an chak a, semifinal beiseina thar an insiam. D3 Business Player of the Match-a thlan Anup D Costa chuan point 40 thawk chhuakin 11 a hloh a, chak beiseiawm takin set khatna leh thumna lakpui mah se mang chhiain Durtlang North a um zui zel. Vawi li an khelh tawhah tlawm vekin tlak an hnaih a, kum kal taa Chhinga Veng Spikers-in sulhnu chhia an hnutchhiah, champion lai ni chhunga chak nei lo zawn rei ber an nih rual chiah a ni.
Inkhel pawimawh leh inhnehtawk taka inbeihnaah Tuichangralin set hnih an hloh avangin point hnih bak an hlawh chhuak zo bik lo va. Durtlang North nen point an insem avangin hmahruaitu TNT-in khelh hnih la nei chungin semifinal an luh phah a, team pahnih hian point kua an kawl mek an umpha thei tawh lo a ni. Hunthar leh TNT hneh lova an tlawm zawn hnuah Tuichangralin rilru lama fiahna an hmachhawn a.
An khelh hmasak bera hliam vanga lak chhuah Saidingpuia Sailo chuan ṭum 14 hlap tlain point 10 a hloh a, taksa lamah a inpeih tawk lo va, ṭum dang a pha lo. Mahse, state pawn aṭanga an lak luh Vinod thlawp zovin Mapuia a che ṭha a, Tuichangral tan mi mala thawh hlawk ber ni khawpin a ṭangkai. Vanlalthlamuanpuia Sailo chuan point kua hmuin vawi hnih chiah a tisual a, setter Hmangaihthanga'n awmze neiin ball a sem a, team pum puiin hma an sawn.
Durtlang North-in derthawng lova set khatna an lak hnuah 9-5-in hma an hruai zui. Mapuia'n ṭha tak taka a vuak thlak hmangin Tuichangral a fuih phur a, lehlam tana point hmutu ber Anup-a vuak an dang fo bawk a, 22-21-a an lehpelh hnuah Khawhai tlangval Saitea'n set an lak theih nan vawi thum a vaw tla. Tuichangralin mar takin hma lam an pan thei bik chuang lo. Durtlang North insiam tharin Anup bakah an inkhelh chhunga point ruk hloha 23 thawk chhuak thei Fabian Lallunghnema'n langsar takin a khel a, set khatna aia nasain set thumna an awpbet.
Durtlang North-in championship kal mek inkhel vawi khata set hnih an lak hmasak ber a ni a, chak tlang thei mai turin rin hlawh hman. Mahse, Tuichangralin inthununna ṭha tak nen set lina bul an ṭan a, inelna sang hmachhawnin 19-19 a nih hnuah 24-24 thlengin an intluk chho zel. Hun pawimawhah Vinod chuan Tuichangral tan point nga a hmu zawn a, 25-24-a sang zawk an nih laiin Mapuia'n net bulah Durtlang North captain Fabian-a hlap a dang thla a, a chak zawk tifel turin set nga an khelh a ngai zui.
Tuichangralin inrintawkna nen bul an ṭan ṭha a, inthlau lo mah se hmahruaitu zawka an ṭang zel. Boruak sangah Durtlang North-in rim takin Karnataka captain Anup an chhawr a, 10-10 a nih hnuah player duhthlan tur ngah zawk leh inring tawn chunga khel Tuichangralin 14-11-in hma an hruai. Anup chuan vawi khat vaw tla leh hman mah se Haryana spiker Vinod chuan a chhang let ve leh nghal a.
Mipa league kal meka set nga an khelhna hmasa berah Tuichangral dingchangin, kar leh thawhṭanni zanah boruak thar hip chungin Chhinga Veng an khelhpui leh ang. Durtlang North-in kar leh thawhlehni zanah Tuipuiral hmachhawnin league an khar dawn a, chak pawh ni se semifinal luh theihna kawng a ping tawh hle.
Stats :
TUICHANGRAL
Vinod Khatkar : point hmuh - 25, point hloh - 11
Saidingpuia Sailo : point hmuh - 14, point hloh - 10
Lalhmunmawia : point hmuh - 22, point hloh - 5
Vanlalthlamuanpuia Sailo : point hmuh - 9, point hloh - 2
Lalrinchhana : point hmuh - 3, point hloh - 3
Hmangaihthanga (setter) : point hmuh - 1, point hloh - 2
Thangminlal : point hmuh - 0, point hloh - 2
DURTLANG NORTH
Anup D Costa : point hmuh - 40, point hloh - 11
Johan Vanneihsanga : point hmuh - 7, point hloh - 2
Fabian Lallunghnema : point hmuh - 23, point hloh - 6
Vanlalṭanpuia : point hmuh - 12, point hloh - 3
R Malsawmtluanga : point hmuh - 2, point hloh - 4
C Zonunmawia (setter) : point hmuh - 5, point hloh - 6
R Vanlalmawia : point hmuh - 5, point hloh - 0
FIXTURE JUNE 16 (ZIRTAWPNI) :
03:30 pm : Kanan v Power De Thang
FIXTURE JUNE 16 (ZIRTAWPNI) :
03:30 pm : Kanan v Power Department Sporting Club (hmeichhia)
08:00 pm : TNT v Chhinga Veng Spikers (mipa)
JUNE 17 (INRINNI) :
03:30 pm : Durtlang v Luangmual (hmeichhia)
08:00 pm : Hunthar v Tuipuiral (mipa)