16 May 2019 07:18

inkhel

Pro Volleyball League: Under 18 Champion Anastasia Electric Veng

Suzuki Gixxer Pro Volleyball League  Under 18 final chu May ni 15, Nilaini zan khan  Anastasia Electric Veng leh Thutak Nunpuitu Team (TNT)  ten an khel a,  Anastasia Electric Veng chuan 3-1 (25-21, 16-25, 25-18, 25-18) a TNT hnehin an champion. 

Hmeichhia inelnaah Durtlang chuan 3-2 (22-25, 25-20, 27-25, 22-25, 15-12) a Bungkawn hnehin an champion bawk. 

Under 18 inelnaah Anastasia Electric Vengin Pro Volleyball League Junior title hmasa ber an la. League-a sang ber leh champion phu ber ni chungin final an khel a, 5-0 a an hneh tawh TNT lakah hnehna chang nawnin an champion. An captain C Zonunmawia chu Best Player-a thlan a ni bawk.

TNT-in league-a an insut tum aiin hmasawn mah se Anastasia hneh tur khawpin an inlan zo lo. League-ah pahnihna ni chungin an tlang a, an tluk loh awm chhun Anastasia ngam lovin pahnihna ni chungin championship an khar.

Under 18 LAWMMAN :

Champion - Rs 25,000/-  trophy + certificate

Pahnihna - Rs 15,000/-  trophy + certificate

Hmeichhia inelnaah rin kailo zawk ni chungin Durtlang an champion a, an spiker tha Lalmuanpuii chuan Best Player lawmman a dawng. League-ah Bungkawn ngam lovin 1-4 in an chak lo va, final-ah an tlawm tawhna chhang letin hnehna chhinchhiahtlak an chang.

Hmeichhe tan Pro Volleyball League buatsaih a nih vawi hnihna a ni. Tel ve ve awm chhun Durtlangin a hmasa zawk 2017-ah final an lut pha lo va, team pathum inel zinga hniam ber an ni. Tun tumah Power Department Sporting Club hnung zuiin champion thei pahnihna an ni.

League an khelh chhungin team pali zingah Bungkawn an chungnung a, an elpui team pathum lakah chungnung takin an chak vek a, final-ah anni aia Pro Volleyball-a tawn hriat nei tam Durtlang lakah uiawm takin an tlawm ve thung. An player tha F Lalparmawii chuan kum hnih kal ta khan Durtlang tan khelin Best Emerging Player-a thlan a lo ni tawh a ni.

LAWMMAN :

Champion - Rs 40,000/- trophy + certificate

Pahnihna - Rs 20,000/- trophy + certificate

(adsbygoogle = window.adsbygoogle || []).push({});