07 May 2019 12:33

inkhel

Tuichangral hnehin Chanmari West-in Semifinal an hnaih

May ni 6, Thawhtanni zan khan Suzuki Gixxer Pro Volleyball League chu Chawnpui Sports Centre-ah khelh chhunzawm a ni a, Chanmari West leh Tuichangral te team intluk tawk takah Chanmari West chuan 4-1in Tuichangral an hneh.

Team pahnih te hian match nga khel ve ve tawhin Chanmari West hian point 11 neiin table-ah palina an ni mek a, Tuichangrql hian point 11 nei ve bawkin panga an ni mek bawk.

May ni 7, Thawhlehni zan dar 8:00-ah khelh chhunzawm leh tur a ni a, table pathumna Anastasia Electric Veng leh parukna Hunthar an inhmachhawn ang.

Set hmasa ber an hloh hnuah ropui takin Chanmari West-in an bei let a, set li la zawnin Tuichangral lakah 11-15, 16-14, 15-4, 15-12, 15-12 in an chak a, beiseina an insiam.

Chawnpui Sports Centre-ah Chanmari West-in a tirah harsatna tawk mah se set hnih hnehsawh takin an awpbet a, hawi kir lovin team tha leh chak duhna nei sang zawk an nihzia Tuichangral lakah an lantir tluan.

Abhimanyu Ray chuan point 30 hmuin 12 a hloh va, mi malin a filawr hle a, Chanmari West chakna hnar pawimawh ber a ni. League vawi nga an khelhah an chak tum hnihna niin Railways player Abhimanyu hian RS Traders Player of the Night lawmman a dawng ve ve.

Abhimanyu thlawp tur khawpin Chanmari West Mizo player zingah mi mala point 10 hlawh thei an awm lo. Mahse, inring tawnin thawhhona tha tak nen inringtawk takin an khel a, David Lalremruata'n point 7 hmuin Lalruatpuia leh Malsawmtluanga point li ve ve an hlawh a, an pathum hian vawi hnih theuh an tisual.

Chanmari West tan hnehna pawimawh a ni a, a hmain TNT hneh tawh mah se an elpui tawk tura ngaih lakah an tlawm zel. State dang player nei team an hneh hmasak ber a ni a, point li an thawh chhuak avangin semifinal lut thei palinaah an insuan chho va, a tawn san lai ber a ni nghal.

Tuichangral an hnungtawlh ve thung a, chak se tlang thei dinhmun tha taka inhung thei an ni. Point 10 nei sain an khel a, point khat chauh an hmuh belh avangin khelh inzatah Chanmari West nen an intluk a, mahse, an pahnih inkarah tlawm zawk an nih miau avangin panganaah an inhung a, an hmabak a derthawng.

Nikuma final lut khaw chhak team tan Jaideep Sandu chuan point 23 hmuin 12 a paih. A vaw sual fo va, lehlamin a ball hlap an dang tla fo bawk a, tum dang a pha lo va, team pumpui an tlahniam. Jaideep tih lova Tuichangral tana che tha Lalhmunmawia leh Lalnunfima'n point thum ve ve hmuin tum khat ve ve an tisual a, an inthlau hle a ni.

Tuichangral hian harsa lo takin set hmasa ber an la nghal a, an khelh tawh atangin rin kai zawk an nih bawk avangin chak zui thei mai thei tura ngaih an ni. Mahse, set hnihnaah chiang takin thil awm dan a danglam hlawk a, Chanmari West-in tanhmun siam remin engkim an thunun fai vek. Tuichangralin point li chiah an hmu tihin an tlang a, league kal meka set khata inhnehna nasa ber a ni.

Inrintawkna leh phurna nasa zawk nen chak mamawh Chanmari West-in an khel zui zel. Set thumnaah deuce ngai khawpin an inbeitawk a, an inelna sang vanglai ber a ni nghe nghe. 14-14 a nih hnuah Tuichangral an chiai a, Chanmari West rinrawl Abhimanyu chuan vawi hnih a vaw tla zawn.

Inhnehtawk zui viau mah se Chanmari West an chungnung zawk zel. Hun pawimawhah Tuichangral pherhin mi mala an inelnaah Jaideep chuan Abhimanyu a ngam lo bawk a, Chanmari West-in derthawng hman lovin set hnuhung pahnih an la zawn a, league kal meka an khelh that ber a ni nghal bawk.

Chanmari West-in nilaini zanah an khelh apianga chak vek awm chhun Chhinga Veng Spikers an su dawn a, league an khar ang. Team boruak an neih that vanglai leh beiseina an neih sang lai takin Chhinga Veng hmaah an inlan dawn a, fiahna pawimawh tak a ni dawn a ni.

Tuichangral dinhmun beng hniam ni mah se semifinal an beiseina phum bo a la ni lo va, zirtawpni zanah anni ang bawka chak mamawh Hunthar nen an intawng dawn. Team sawi thiam har tak Tuichangral hian set li lain Durtlang North an hneh thei a, an khelh that tum a nih chuan tawhkhirh tak an ni tih an lantir tawh.

TABLE
1. Durtlang North - play 5, point 16
2. Chhinga Veng Spikers - play 4, point 15
3. Anastasia Electric Veng - play 4, point 11
4. Chanmari West - play 5, point 11
5. Tuichangral - play 5, point 11
6. Hunthar Veng - play 4, point 10
7. Thutak Nunpuitu Team - play 5, point 6

May ni 8, Nilaini zan dar 8:00 Fixtures
Chanmari West vs Chhinga Veng Spikers

(adsbygoogle = window.adsbygoogle || []).push({});