09 May 2019 01:17

inkhel

Pro Volleyball League: Semifinal lut hmasa ber Chhinga Veng

May ni 8, Nilaini zan khan Suzuki Gixxer Pro Volleyball League Chhinga Veng Spikers leh Chanmari West inkhelah Chhinga Veng Spiker chuan 3-2 in Chanmari West an hneh. 

Chhinga Veng Spiker hian match nga khel tawhin point 15 an nei mek a, hmahruaitu an ni mek bawk. Chanmari West hian match ruk khel tawhin point 13 an nei tawh a, a sang pali zingah an la tel pha ve bawk.


Chhinga Veng Spikers-in inkhel hautak pal tlangin 15-9, 13-15, 16-14, 13-15, 15-10 in Chanmari West an hneh a, semifinal lut hmasa ber niin table chung berah an kir.


Chawnpui Sports Centre-ah Chhinga Vengin harsa takin an chet that kal tluang an chhunzawm a, a bul leh a tawpah team tha zawk an nihna lantirin set thum an la. Vawi nga an chak zawnna niin khelh khat la nei mah se point 18 khawl an tawh a, a sang pali zingah an tel dawn tih a chiang.


Chak ngei ngei mamawh Chanmari West-in chiai takin bul an tan a, set hnihna atangin an tanhmun siam rem thei mah se set thumnaah hun tha an bawhpelh. Set hnuhnung berah an zuih bawk a, rei tak chhung nghet leh mar takin an khel thei lo va, an tuar.


Spikers vice captain Mandeep Singh chuan hnehna an chan theih nan a thawh hlawk leh hle a, point 33 hmuin 13 a hloh va, a vawi nga nan RS Traders Player of the Night-a thlan a ni. Kawng engkimah Chhinga Veng innghahna a ni a, Mizo player zingah point 10 hmu phak an awm lo.


Abhimanyu Ray chuan set hnih an lak theih nan Chanmari West tanpui mah se a tawk zo lo va, point 20 hlawhin vawi sarih a tisual. League vawi sarih khel kim hmasa ber an ni a, point 13 kawlin palina luah lailawk mah se Chanmari West tan semifinal kawng a ping a, vawi nga an tlawm a ni.


Set hmasa berah inrintawkna nei zo lovin Chanmari West-in bul an tan a, 5-1 in Chhinga Vengin hma an hruai nghal. Point 10 an hmuh hmain rin kai zawk Spikers an tlang a, set hnihna atangin el thamin Chanmari West an inlan.


Thawhhona tha tak nen inringtawn takin Chanmari West-in an khel a, 8-4 in hma an hruai. Mandeep chuan Spikers fuih phurin an nawr let ve thung a, 13-13 ni chhovin an inbei hle.


Mahse, Chhinga Vengin anmahni tihsual an tuar a, F Lalngilneia'n a service sual a, Mandeep chuan vaw dik lo ve lehin Chanmari West an tlang. Set thumnaah harsa lova tlang thei turin Spikers-in 14-10 in hma an hruai.


Chanmari West-in nawr letin David Lalremruata leh Abhimanyu chuan an a vaw tla zawn. Mandeep leh R Rosangpuia'n tisual zawn lehin 14-14 a ni a, an deuce. Hun pawimawhah Mandeep a inlar a, inhnial theih taka a hui tlak hnuah vaw tla lehin derthawng takin set an la.


Set hnih a la awm a, chak ngei tumin Chanmari West an insiam thar a, set linaah a tir atangin hma an hruai. A tawp lamah Chhinga Vengin tibuai leh hman mah se 14-13 a nih laiin Hrangtinkhuma'n an thinphu tirehin a hlap tla.


Set hnih ve ve an lak hnuah Chanmari West zawkin an insawrbingna an hloh va, ho taka tihsual an neih thin bakah Mandeep an dang thei lo. Boruak sanga fei zawk Chhinga Vengin nuam ti takin an khel zui a, hlim takin a tawp an khar.


Chhinga Veng tan short ball changtu leh lehlam vuak dang tura zuang taima tak Mangila'n point kua hmuin point nga a hloh va, Lallianmawia Pachuau (hmuh 7, hloh 1) leh Lalnunpuia (hmuh 6, hloh 3) chuan team an tanpui bawk.


Chanmari West-in chhe takin league bul an tan a, an khelh hnuhnun vawi hnihah el tham tak ni mah se a tir lama an chet fuh loh avangin an dinhmun a tha phak lo. Spikers hmaah Khumtea'n point 10 hmu phakin vawi khat a tisual a, David Lalremruata'n point sarih hlawhin point li a paih a ni.


Tlang chiang sa chungin Chhinga Vengin league khar nan inrinni zanah an khel leh dawn a, an elpui ber ni mek Durtlang North an bitum ang. Table-a sang ber nih an inchuhin dawn a, semifinal-a an khelh tur hriltu tur inkhel a ni dawn a ni.


TABLE
1. Chhinga Veng Spikers - play 5, point 18
2. Durtlang North - play 5, point 16
3. Hunthar Veng - play 5, point 14
4. Chanmari West - play 6, point 13
5. Anastasia Electric Veng - play 5, point 12
6. Tuichangral - play 5, point 11
7. Thutak Nunpuitu Team - play 5, point 6


May ni 9, Ningani zan dar 8:00 Fixtures
TNT vs Anastasia Electric Veng

May 10, Zirtawpni zan 8:00 Fixtures
Hunthar vs Tuichangral 

(adsbygoogle = window.adsbygoogle || []).push({});