12 May 2019 01:47

inkhel

Pro Volleyball League: Semifinal lut a hriat kim ta

May ni11, Irinni zan khan Suzuki Gixxer Pro Volleyball League round hnuhnung ber Durtlang North leh Chhinga Veng Spikers te inkhelah Durtlang North-in Chhinga Veng Spikers chak tluang titawpin 15-9, 15-10, 15-13, 9-15, 18-16 (4-1) in Chhinga Veng Spiker an hneh a, league-a sang ber ni chungin semifinal an khel dawn.

Ti hian semifinal an lut a hriat kim ta a, Chhinga Veng Spikers hian point 19 neiin pahnihna an ni a, Hunthar Veng hian point 17 neiin pathumna an ni, Anastasia Electric Veng hian point 16 neiin palina an ni bawk.

Chawnpui Sports Centre-ah team pahnihin league hmahruaitu nih an inchuh a, a chung bera awm sa chunga khel Chhinga Vengin set hnih an mamawh. Pathumna atanga a lera inhlangkai turin Durtlang North-in set li an mamawh ve thung.

Durtlang North-in table lera a tir atangin khawng takin an khel a, set thumna la zawn nghalin mar takin an inlan. Vawi nga chak zawn tawh Chhinga Veng hneh hmasa ber an ni a, set linaah tla fual mah se harsa takin set hnuhnung berah an kir leh a, inelna sang leh boruak rit hnuaiah an dingchang.

Setter Ramtharnghaka'n ball a sem rual tha a, Durtlang North player-te an intluk tlang hle. Rahul Kataria chuan point 15 hmuin point 9 a hloh a, Lalbiakmuana leh Vanlaltanpuia'n fel fai takin an khel a, vawi kua ve ve vaw tlain tihsual tum khat ve ve an nei. Zomuanpuia'n point kua a thawk chhuak a, point thum Fabian Lallunghnema (hmuh 7, hloh 2) pawhin awmzia a nei.

League kharnaah Chhinga Vengin hma an hruaina humhim zo lovin a vawi khat nan tlawm mah se, Mandeep Singh chuan a zawnin vawi ruk RS Traders Player of the Night lawmman a dawng a, point 24 hmuin vawi kua a tisual. Lallianmawia Pachuau chuan point sarih leh F Lalngilneia'n point nga hmuin paih nei lo ve ve mah se team pumpui inbeihnaah Durtlang North an ngam lo deuh.

A tir atangin Rahul, Tpa, Biakmuana leh Zoma'n rin tlakin Durtlang North tan an khel a, harsa lovin an chakpui. Mahse, Spikers lehpel turin set khat an la mamawh a, set linaah erawh thil awm dan a inthlak. Mandeep chuan Chhinga Veng fuih phurin L-a leh Mangila'n tha takin an thlawp bawk a, Durtlang North-in point 10 an hmuh hmain an tlang.

Team pahnihin league-a sang ber ni turin set khat ve ve an la mamawh a, set khat chiah khelh tur an nei tawh. A tir lamah talbuai deuh mah se Mandeep chuan chungnung takin a khel zui zel a, 8-4 in Spikers-in hma an hruai a, tlang thei mai turin 13-8 in an sang zui leh.

Derthawng taka an awm hnuah Durtlang North-in fiahna harsa pal tlangin an bei let. Rahul leh Zoma'n ball an hmuh puitlina an vuak tlak bakah lehlam rinrawl Mandeep chuan fimkhurna hloh thenin tum khat aia tam a hlap sual a, a vuak an dansak thei a, ho takin Chhinga Vengin point an paih tel.

14-14 a nih hnuin vawi hnih an deuce a, Durtlang North-in hmahruai zawk zel mah se anmahni tihsual vangin 16-16 a ni chho. A vawi thum nan 17-16 in hma an hruai leh a, Chhinga Veng spiker Mandeep chuan vuain net bulah Fabian Lallunghnema'n a dang tla a, hlim takin Durtlang North-in hnehna leh league-a sang ber an nihna an lawm.

Thawhtanni zanah Durtlang North-in semifinal an khel leh nghal dawn a, league-a palina Anasatasia Electric Veng nen an intawng ang. Thawhlehni zanah Chhinga Veng leh league-a pathumna Huntharin final luh an inchuh ve leh dawn a ni.

Mipa Senior Semifinal Fixtures

May ni 13, thawhtanni
08:00 PM Durtlang North vs Anastasia Electric Veng

Mipa Junior Semifinal Fixtures

May ni 13, Thawhtanni
06:00 PM Anastasia Electric Veng s Hunthar

(adsbygoogle = window.adsbygoogle || []).push({});