08 May 2019 01:17

inkhel

Pro Volleyball League: Hunthar an chak khep khep

Suzuki Gixxer Pro Volleyball League khelh mekah May ni 7, Thawhlehni zan khan Hunthar leh Anastasia Electric Veng te inkhelah Hunthar chuan 4-1 in Anastasia Electric Veng an hneh.

Hunthar hian match nga khel tawhin point 14 an nei mek a, table-ah pathumna an ni mek. Anastasia Electric Veng hian match nga bawk khel tawhin point 12 an nei tawh a, table-ah palina an ni mek bawk.


Under 18 inkhelah Hunthar chuan 3-2 (17-19, 15-10, 9-15, 15-10, 15-13) in Anastasia Electric Veng an hneh a, hmeichhia inkhelah Durtlang chuan 5-0 (15-8, 15-9, 16-14, 15-9, 15-9) in Bethlehem Vengthlang an hneh bawk.

May ni 8, Nilaini zan dar 8:00-ah panga Chanmari West leh pahnihna Chhinga Veng an inhmachhawn ang.

Deepesh Kumar Sinha chuan langsar takin a khel a, Huntharin set li lain 18-16, 20-18, 15-9, 11-15, 15-9 in an elpui Anastasia Electric Veng an hneh. Chawnpui Sports Centre-ah mi malin Deepesh a che nasa hle a, Hunthar tana ball vawtu ber ni tluan zakin point 36 a hlawh chhuak a, 20 a paih tel. An chakna hnar pawimawh ber niin RS Traders Player of the Night-a thlan a ni.


Set hmasa pahnihah deuce ngaiin an inbeitawk a, Deepesh chuan Hunthar tan boruak rit vai kiangin harsa takin an tlang zawn. Hemi hnu hian Anastasia an bet a, set linaah arh chhuak ve leh zawk mah se Huntharin rang takin an nawr bet leh nghal a, nuam ti takin an khel.


State dang atanga player pahnih la lut awm chhun 2016 champion Anastasia-in beisei an phak lo va, inelna sangah an player chawk luh pahnihna an tangkai zo lo. Player nei tha rual ber pawl ni mah se a vawi thum nan an tlawm a, an derthawng.


Electric Veng hian semifinal lut thei hniam ber palinaah awm mah se an hnuaiah point 11 kawl ve ve Chanmari West leh Tuichangral an awm. Vawi khat theuh an la khel dawn a, semifinal khel tur a la chiang lo hle.


Hetih lai hian table hniam bera awm leh point ruk nei mek TNT an tla. Vawi khat an khelh leh turah set la vek pawh ni se point 11 bak an thawk chhuak zo tawh lo va, palina ni mek Anastasia an phak thei tawh lo a ni.


Vawi thum a zawna champion an tumna kawngah Huntharin rahbi lian tak an tuk ve thung. Anastasia lakah point li an hmuh avangin semifinal lut thei dinhmun thaah an inhlangkai a, point 14 kawlin khelh khat an la nei.


Tum dang zawng aiin mi mala innghat leh zualin Huntharin an khel a, a hma chauh ni lovin a hnunga a awm lai pawhin Deepesh-a hnenah ball an pe tam em em. Lehlam dan phak loha sang atangin India senior team tana khel tawh hian a vaw tla thei a, dan a har.


Mahse, set nga chhung mar takin a khel tluan bik lo va, lehlam vuak danga a zuang char char bawk avangin tihsual a nei nual. Deepesh a tlakhniam rualin Hunthar an hnungtawlh a, mahse, Anastasia-in an dang theih loh bakah an player zingah el phak an awm lo.


Set hmasa berah vawi thum an deuce a, tlang zawk thei turin 16-15 in Anastasia-in hma an hruai hman. Hun pawimawhah Deepesh chuan Hunthar tan point thum a zawnin a thawk chhuak a, lehlamin an dang thei lo.


Set hnihnaah a hma aiin an inbei nasa a, vawi nga an deuce. PC Lalnunhlua leh Rajath Shrivarathri chuan Anastasia tlangpui tum hle mah se 18-18 a nih laiin Deepesh chuan a vaw tla a, Rajath chuan chhang let tura hun tha a neih bawhpelhin a vaw sual ve thung.


Set thumnaah Electric Veng team an talbuai zui a, awmze neiin an khel lo va, awlsam takin Hunthar an tlang a, he inkhelah hian an chak nghal bawk. Mahse, set linaah Deepesh a chau va, Huntharin rinrawla hman player dang an nei chuang lo va, Rajath thlaktu Sunil S leh Laldensanga'n Anastasia tanpuiin point khat an hlawh chhuak.


Hunthar an intuai thar a, set hnuhnung berah a hma zawng aia intelruh thain an khel. Rin ber tur awm chuang lova player inthlak kual nasa tak Anastasia an chiri leh viau a, rilru lamah harsatna an tawk tel.


13-7 in Huntharin hma an hruai a, setter che tha tak Remsangzuala'n hui tlain Deepesh chuan a hlap tla zui bawk. Point sarihah Electric Veng team an tawp a, kawng engkimah an bet a, danglamna siam thei tur player kawl nual chungin awmze neia team fuih phurtu an awm lo.


Hunthar lamah Deepesh a filawr a, amah hnaih ber chu setter Lalmama point nga hmuin point khat a hloh va, Lalrinhlua (hmuh 4, hloh 2), Lalduhsanga (hmuh 3, hloh 0) leh mi dang aiin point a thawk chhuak tam.


Huntharin tlang chiang turin set thum an la mamawh a, zirtawpni zanah Tuichangral nen an intawng dawn a, league an khelh hnuhnun ber a ni ang.

Chet that leh chhiat inchhawka khel mek Anastasia-in league khar nan a mawnga awm leh la chak ve lo awm chhun TNT an su dawn. Rin kai zawk ni dawn mah se an team boruakin an dinhmun thui takin a hril dawn a, ningani zanah tlin leh tlak hril turin inkhel an hmachhawn ang.

TABLE
1. Durtlang North - play 5, point 16
2. Chhinga Veng Spikers - play 4, point 15
3. Hunthar Veng - play 5, point 14
4. Anastasia Electric Veng - play 5, point 12 5. Chanmari West - play 5, point 11
6. Tuichangral - play 5, point 11
7. Thutak Nunpuitu Team - play 5, point 6  

(adsbygoogle = window.adsbygoogle || []).push({});