Suzuki Gixxer Pro Volleyball League khelh mekah April 25, Ningani zan inkhelah Hunthar chuan 7-15, 15-11, 15-12, 13-15, 15-12 (3-2) in Chanmari West an hneh a point ruk nei tawhin table-ah pathumna an ni mek.

Champion lai Huntharin harsa takin an thenawm Chanmari West an hneh. Ningani zan Suzuki Gixxer Pro Volleyball League-ah nawi taka bul an tan hnuah 7-15, 15-11, 15-12, 13-15, 15-12 in an chak.

Set hnihna atangin Huntharin an theihna an lantir thei chauh. Deepesh Kumar Sinha chuan team tanpuiin inkhel hautak leh inbeihna sang takah inrintawkna nei zui theiin an tlang hram a, vawi hnih an khelh tawhah set hnih ve ve hlohvin an chak zawn.

India senior team-a khel phak Deepesh chuan point 30 hlawhin 13 a hloh. Hunthar point hmuh 46% chuang a thawk chhuak a, TNT an hneh tum ang bawkin RS Traders Player of the Night-a thlan a ni.

Hunthar tan Lalremsanga'n point riat thawk chhuakin point hnih a paih a, set hnuhnung berah Lalrinhlua'n a thawh hlawh viau bawk. Team pasarihin vawi hnih theuh an khelh tawhah point ruk hmuin pathumnaah an inhlangkai a ni.

Set khat mah la lova Durtlang North laka an tlawm hnuah Chanmari West-in nung takin bul an tan a, awlsam takin set an la nghal. Mahse, set nga tlo taka khel turin tlakchham an la nei tih a lang a, hma an sawn tih erawh an lantir.

League point hnih an thawh chhuah theih nan Chanmari West tan veikhawr Abhimanyu Ray chuan point 21 hmuin point kua a hloh. Hrangtinkhuma'n vawi kua vaw tlain tum hnih a tisual a, David Lalremruata'n rin ngam pangngai takin a khel bawk.

Chanmari West-in point an mamawh tih hriain fuh leh tha takin Hunthar lakah bul an tan. Abhimanyu leh Khumtea'n inkhel thununin el phak lovin an inlan a, Hunthar rinrawl Deepesh chuan point hnih hmuin vawi li a tisual a, an khel a buai hle.

Set hnihna atangin Huntharin an tanhmun an siam rem a, 4-0 in hma an hruai zui nghal. Chungnung takin Deepesh chuan a khel a, a hmaa a awm lai leh a hnung atang pawhin dan theih lovin a hlap. Team fuih phurin inzawmna tha tak nen inringtawk takin an khel thei.

Set hnihnaah Chanmari West-in an nawr let zo lo va, set thumnaah kir leh turin 9-6 in an sang ve leh. Mahse, Huntharin insawrbing leh zualin an bei a, 10-10 a nih hnuah Chanmari West an tlahniam a, Deepesh chuan set hnih an lak zawn theih nan a elpui Abhimanyu a beng hniam.

Set linaah boruak a inthlak zui ta tho va, Chanmari West er letin 13-13 a nih hnuah Deepesh chuan vaw sualin Chanmari West tan Abhimanyu chuan set hnih an lak theih nan a vaw tla ve thung.

Pro Volleyball-a tawn hriat nei tha leh tam zawk Huntharin a chak zawn tihfelna set hnuhnung berah 10-4 hma an hruai zui. Chanmari West-in point li hmu zawnin boruak a nung thar leh na a, Rinhlua'n awmze nei takin Hunthar tan a khel a, 14-12 a nih hnuah Deepesh chuan Abhimanyu-a vuak a dang thla.

Vawi thum champion zawn an tumna kawngah Huntharin tlawm nei lo mah se vawi hnih an khelh tawhah rinhlelhna an la vai kiang zo lo va, kar leh thawhlehni zanah table-a anni aia sang Durtlang North nen an inkhel leh ang.

Chanmari West-in kar leh thawhtanniah anni ang bawka chak la nei lo TNT an bitum dawn. Vawi thum tlawm zawn zawk hmabak a thim viau dawn a, team pahnih tan chak a pawimawh leh zual hle dawn a ni.

Junior league-ah inhnehtawk takin set nga an inkhel tluan bawk a, Hunthar Under 18 team-in set li lain 15-10, 13-15, 15-7, 18-16, 19-17 in Chanmari West Under 18 an hneh.

TABLE:

1. Chhinga Veng Spikers - play 2, point 9

2. Durtlang North - play 2, point 8

3. Hunthar Veng - play 2, point 6

4. Anastasia Electric Veng - play 2, point 5

5. Thutak Nunpuitu Team - play 2, point 3

6. Tuichangral - play 2, point 2

7. Chanmari West - play 2, point 2

April 27, Inrinni - 8:00pm Fixtures

Anastasia Electric Veng v Chhinga Veng Spikers

April 27, Inrinni Under 18, Time 6:00pm Fixtures

Anastasia Electric Veng U18 v Chhinga Veng Spikers U18