05 May 2019 02:38

inkhel

Pro Volleyball League hmahruaitu Durtlang North

Suzuki Gixxer Pro Volleyball League 2019 Chawnpui Sports Centre-ah khelh chhumzawm zel a ni a, May ni 4, Inrinni zan inkhelah Durtlang North chuan 4-1 (15-7, 11-15, 15-10, 15-7, 15-13) in Thutak Nunpuitu Team (TNT) an hneh.

Durtlang North hian match nga khel tawhin point 16 an nei mek a, table-ah hmahruaitu an ni mek. TNT hian match nga khel ve tawhin point 6 an nei mek a, table mawngphah an luah lum mek thung.

May ni 6, Thawhtanni zan dar 8:00-ah khelh chhunzawm leh tur a ni a, table pangana

Tuichangral leh parukna Chanmari West an inhmachhawn ang.

Durtlang North-in semifinal an hnaih zel a, inrinni zan Suzuki Gixxer Pro Volleyball League-ah set li lain Thutak Nunpuitu Team lakah 15-7, 11-15, 15-10, 15-7, 15-13 in an chak a, table chung berah an inhlangkai.

Chawnpui Sports Centre-ah Lalbiakmuana leh Rahul Kataria chuan Durtlang North tanpuiin league point li an thawk chhuak. Vawi nga an khelh tawhah point 16 an hmu a, point khatin Chhinga Veng Spikers an lehpel a, vawi khatin an khel tam ve thung a ni.

Biakmuana'n point 16 hmuin point nga a hloh va, Rahul chuan point 17 hlawhin tum ruk a tisual ve thung. Mi mala che tha ve ve an ni a, Mizo player zawkin RS Traders Player of the Night lawmman a dawng.

Durtlang North hian league kharnaah an elpui Chhinga Veng an hmachhawn dawn a, table-a sang ber nih an inchuh ang. Chutih laiin semifinal lut tluka ngaih ni tawh mah se chhiarkawp danin an dinhmun a la him bik lo a ni.

Mizo hlanga khel TNT-in a mawng ber an luah zui zel a, vawi nga an khelh tawhah chak nei lovin an tlawm vek a, point ruk an hmu. Muanna Veng team hian an khel chhe hran lo va, team dang el tur khawpin player an nei tha tawk lo va, Anastasia Electric Veng an bitum leh ang.

An khingpui lakah TNT tlawm zel mah se championship kal mekah Laldinchhunga'n mittlung takin a khel. Durtlang North lakah point 11 hmuin point hnih a hloh va, TNT player pawimawh niin set khat an lak theih nan a thawh hlawk.

Muanna Veng team tan player naupang VL Sangluaia Sailo chuan point ruk hmuin tum li a tisual a, captain Lallungmuana'n vawi nga vaw tlain point hnih a paih a, Sadraka'n point li hlawhin vawi khat a tisual.

Boruak sang leh hun pawimawh bikah danglamna siam thei player rin ngam an nei tha lo va, an khelh tawhah TNT tan tawn hriat nei tawhte aiin an player naupang zawkte an che tha tlangpui.

Rin hlawh zawk an nih angin Durtlang North-in a tir atangin nuam ti takin an khel a, set khatna an lak hnuah talbuai zui mah se set thumnaah kawng dikah an kir leh a, a tawp thlengin mar takin an khel tluan.

Set hnihna tirah ho taka an tihsual fo avangin Durtlang North-in an tuar a, 7-3 in TNT-in hma an hruai a, inkhel boruak a inthlak. Muanna Veng team-in tha takin an khel a, set hnihna an lak bakah set thumna thlengin an inhnehtawk zui hle.

9-7 in Durtlang North an sang a, TNT tan ball vuak thlak tumin Hosanna Lalawmpuia'n a zuang a, tawlh sualin a inhliam a, a khel zui thei lo. Durtlang North-in inkhel an thunun zui a, a tawp thlengin TNT-in chhang let turin an bei let zo lo.

Biakmuana leh Rahul bakah Fabian Lallunghnema, Zomuanpuia leh Vanlaltanpuia'n tha takin Durtlang North tan an khel. Fabian-an point sarih thawk chhuakin point thum a hloh va, Hunthar an hneh tuma a tawp lama che tha tak Zoma'n vawi ruk vaw tlain point thum tho a paih.

TABLE

1. Durtlang North - play 5, point 16

2. Chhinga Veng Spikers - play 4, point 15

3. Anastasia Electric Veng - play 4, point 11

4. Hunthar Veng - play 4, point 10

5. Tuichangral - play 4, point 10

6. Chanmari West - play 4, point 7

7. Thutak Nunpuitu Team - play 5, point 6

(adsbygoogle = window.adsbygoogle || []).push({});