Suzuki Gixxer Pro Volleyball League final chu Chawnpui Sports Centre-ah May ni 16, Ningani zan dar 8:00-ah Durtlang North leh Chhinga Veng Spikers te a vawi khat nan champion ve ve tumin an inhmachhawn dawn. 

Match tan hmain a kharna inkhawm neih a ni ang a, sports minister Pu Robet Romawia Royte chuan khuallian niin a hmanpui ang.

Team pasarih inel zinga final luh phu ve vein trophy an inchuh dawn. League-a sang ber ni chungin Durtlang North an tlang a, pahnihna ni chungin Chhinga Vengin knockout round an lut ve thung.

Championship kal meka vawi riat an khelh tawhah tum khat ve ve an tlawm. Durtlang North-in league-ah rin loh takin Tuichangral an ngam lo va, 1-4 in an tlawm. Chhinga Vengin league kharnaah 1-4 in Durtlang North an hneh lo ve thung a, hmahruaitu an nihna an hloh phah nghe nghe a ni.

Pro Volleyball-ah tawn hriat an neih a inchen hle. 2018 atangin Mizoram volleyball inelna sang berah Durtlang North an tel a, an khelh hmasak berah filawr takin league-ah an inlan. Mahse, semifinal-ah Tuichangral hneh lovin an tla a, tun tumah hian a vawi khat nan final an khel ang.

2017 khan a vawi khat nan Pro Volleyball-ah Chhinga Veng an tel a, final an luh thlengin set hloh lovin an chak fai vek. Mahse, a tawpah Hunthar ngam lovin pahnihna an ni a, kum khat an awl hnuah kir lehin tun tumah final an lut leh. Kum hnih kal taa an chet sual tawhna siam thaa a vawi khat nan champion ngei an tum hle. 

Durtlang North-in league-ah Chhinga Veng an hneh tawh avangin inrintawkna an neih san phah dawn a, an pahnih inkara champion tura rin hlawh zawk pawh an phah maithei ? Semifinal-ah 3-1 in Anastasia Electric Veng an hneh a, Chhinga Veng aiin an kalkawng a awlsam a, ni khatin hahchawlhna hun an ngah zawk bawk.

Spikers-in semifinal-ah inkhel hautak leh hahthlak su tlangin 3-2 in champion lai Hunthar an vaw tla a, darkar 48 a ral hmain inkhel pawimawh em em an hmachhawn zui dawn. Durtlang North nen Pro Volleyball-a an insut awm chhunah an tlawm a, delhtu rit tak nei tel chungin final an khel dawn a, chona a sang dawn hle a ni.

An khelh hnuhnun vawi hnih hmangin Durtlang North-in an dinhmun an siam lian a, Chhinga Veng leh Anastasia lakah inkhel tam zawk thunun theiin an chak ve ve. Hetih chhung hian state pawn atanga an lak luh Rahul Kataria a che tha a, point 37 hmuin 20 a paih a, team tichaktu ber pakhat a ni.

An khelh tawh zawng zawngah mi mala thawh hlawk em em Lalbiakmuana'n Chhinga Veng an hneh tumin point 10 hlawh pha lo mah se Mizo Best Player lawmman dawng thei tura rin kai zinga mi a ni. 2017 khan Hunthar tanpuiin trophy a la tawh a, Mizo player tha ber lawmman a dawng.

Durtlang North hi team inkhairual leh thawhhona nei tha an ni a, an khelh tawhah mi mala innghah bur an ni lo. Mizo setter tha Ramtharnghaka'n thiam leh rual takin ball a sem a, Rahul leh Biakmuana bakah Vanlaltanpuia, Zomuanpuia leh Fabian Lallunghnema'n team tan awmzia an nei thei vek.

Chhinga Vengin innghahna bik an nei a, Mandeep Singh a pawimawh hle. An khelh hnuhnun vawi hnihah point 64 hmuin 29 a paih a, a khelhpui zinga amah thlawp thei ber Lallianmawia Pachuau chuan point 13 hlawhin vawi thum a tisual ve thung.

Spiker tha ber ni tura rin kai Mandeep hi Chhinga Veng leh Durtlang North tan pawh final-a mi mala ngaihven ngai ber a ni dawn tih a chiang. Mandeep-a vuak dang thei tura Durtlang North-in ruahmanna an siam fuh a nih chuan champion turin hamthatna an nei hle ang. 

(adsbygoogle = window.adsbygoogle || []).push({});