RS Traders Pro Volleyball League Round 3-na chu April ni 3, Thawhlehni zan khan R Dengthuama Indoor Stadium, Mualpui khelh a ni a, Durtlang North chuan Set hmasa pahnih an hloh zawn hnuah 3-2 in Anastasia Electric Veng an hneh.
April ni 4, Nilaini zan dar 8:00-ah TNT leh ITI an inhmachhawn ve leh ang.
(adsbygoogle = window.adsbygoogle || []).push({});
Durtlang North 3-2 Anastasia Electric Veng
(20-25, 17-25, 25-18, 25-22, 15-12)
R Dengthuama Indoor Stadium, Mualpuiah Durtlang North tantu mipui deuh vek an pungkhawm a, a tir atangin zaiin an au a, lehlamin thawm nei tham tantu an nei lo. Mahse, 2016 champion Anastasia-in a tir atangin khelmual chhungah boruak an thunun ve thung.
Rin kai zawk ni mah se Durtlang North an talbuai a, league kal meka Anastasia khelh that ber a nih bakah state pawn atanga an lakluh Atul Kumar Singh chuan a vawi khat nan hnehna chang mai thei turin a tanpui a, harsa lo takin set an la zawn.
Pro Volleyball-a an inlan vawi khatnaah Durtlang North-in tha takin bul an tan a, set hloh lova khelh hnih an chak zawn nghal. Mahse, beisei pha lo taka vawi hnih khel tawh Anastasia lakah an nihna an hloh nasa a, pherh takin an khel.
Hun khirh taka an awm laiin mipui au thawm a zuai lo va, Nakul Dev chuan team fuih phurin chak thei tura hun tha an neih hnuhnun berah tanhmun an siam rem. Lalbiakmuana, Zomuanpuia leh Laltlanchhuahaten team an tanpui bawk.
Kawng dikah Durtlang North an kir a, set thumna leh linaah team inpumkhatna leh thawhona lantirin Nakul-an langsar takin a khel thei. Anastasia an insiam rem leh thei lo tawh lo va, a vawi khat nan chak an tumna tuai thar leh turin an bei let zo lo.
Set nganaah 11-11 atangin Durtlang North-in an kalsan a, team tha zawk an nihna lantirin ropui takin hnehna kawngah an kir. Tlawm nei lova vawi thum an chak zawnna a nih rualin a vawi khat nan set an hloh va, set hnih an hloh zawn avangin point khat an hloh tel bawk.
Hnehna an chan theih nan Nakul Dev chuan point 52 hmuin 16 a paih a, phu takin RFL Plastics Player of the Night lawmman a dawng. Lalbiakmuana'n vawi 15 vaw tlain tum kua a tisual a, Zomuanpuia leh Laltlanchhuaha'n point riat ve ve hlawhin tum hnih ve ve an hloh.
Anastasia-in boruak thar an hip hman a, league kal mekah a vawi khat nan set an la a, set hnih la zawn nghalin point hmasa ber an thawk chhuak bawk. Mahse, hun harsaah an la hriam tawk lo tih a lang.
Veikhawr Atul chuan point 42 hlawhin 23 a hloh a, team tan awmze nei zawkin a khel thei a, chanchin lawmawm a ni. Electric Veng team tan Laldensanga'n awmzia a nei tham lo va, Lalrinchhana Renthlei chuan vawi 11 vaw tlain tum riat a tisual a, R Lallawmkima'n point ruk a hmuh laiin point khat a paih.
An chak hnuah Durtlang North mipuiin 'Lalpan Thil Ropui Min Tihsak E' tiin an zai rual a, an zinga mi Lalruatkimi chu RS Traders Third Eye Solution Fan of the Night-a thlan a ni. He team hian champion lai Hunthar leh TNT an su zui dawn a, khelh thumah point riat hmuin hma an hruai.
Khelh thumah point khat hmuin panganaah Anastasia an awm ve thung a, hma an sawn hret. An tan beiseina a la tawp bik lo va, an hmabakah ITI Veng leh HUnthar an la awm a, an chak ve ve a nih chuan semifinal kawng a la inhawng thei.
Round 3 April 5, Ningani Fixtures:
8:00pm Hunthar vs Tuichangral
(adsbygoogle = window.adsbygoogle || []).push({});