Suzuki Gixxer Pro Volleyball League Chawnpui Sports Centre-ah khel mek a ni a, April 24, Nilaini zan inkhelah Anastasia Electric Veng chuan 9-15, 12-15, 15-12, 15-8, 16-14 (3-2) in Tuichangral

an hneh.

RS Traders Player of the Night-ah Jaideep Sandu (Tuichangral) chu thlan a ni a, RS Traders Fan of the Night-ah Lalhmangaihi (Anastasia Electric Veng) chu thlan a ni ve bawk.

Under 18 inkhelah Anastasia Electric Veng chuan 15-8, 15-4, 15-11, 12-15, 15-9 (4-1) in Tuichangral an sawp thung.

Helhkam nei chungin a vawi khat nan Anastasia Electric Veng an chak a, nilaini zan Suzuki Gixxer Pro Volleyball League-ah Tuichangral nen inkhelin set hmasa pahnih an hloh hnuah 9-15, 12-15, 15-12, 15-8, 16-14 in an chak.

Chawnpui Sports Centre-ah thlawptu ngah zawk leh rin kai Anastasia-in pherh takin a tir lamah an khel a, beisei an pha lo takin set hmasa pahnihah an inlan. Set thumna atangin kawng dikah an kir a, a tawp thlengin an hawi kir tawh lo.

2016 champion Electric Veng team hian an khelh hmasak berah fuh takin bul an tan ve thung. Durtlang North lakah set hmasa pahnih an lak hnuin an zuih ral a, Tuichangral hmaah erawh an arh chhuak thei a, hmabak eng an insiam.

Jaideep Sandu chuan Aizawl pawn team tan point 22 hmuin vawi kua a tisual. A vawi khat nan RS Traders Player of the Night lawmman dawng mah se team a chakpui zo lo va, vawi hnih an khelhah Tuichangral an tlawm zawn.

Anastasia innghahna pawimawh Laldensanga'n damlohna avangin a khel thei lo. TNT spiker hlui Densanga hi nilaini zanriah a ei khamin a tlu thuta nikhawhrelovin a awm zui; damdawi in panpui a ni a, a thiante inkhelh laiin stroke vangin LRM Hospital ICU-ah hun a hmang.

Durtlang North nen an inkhelh tuma RS Traders Player of the Night-a thlan Densanga thil tawn hre chungin Electric Veng team-in zawi leh nguai takin an khel. Tuichangralin phur takin bul an tan ve thung a, mi mal langsar awm lovin inringtawn leh nung takin an inlan.

Lehlamin point 10 an hmuh ve hmain khaw chhak team-in league kal meka a vawi khat nan set an la. Inringtawk takin an khel zui a, Anastasia-in insiam rem tum ngial mah se Jaideep chuan Tuichangral tanpui.

Set hnih la zawn turin Tuichangralin 14-9 in hma an hruai. Anastasia-in an bei let viau a, point 12 an hmu tihin lehlam vice captain Lalrinchhana'n a vaw tla. Set an hloh zawn mah se set hnihna tawp lamah inrintawkna nei theiin Electric Veng team-in insiam thar hman.

A tir lamah coach PC Lalhriatpuia'n state pawn atanga an lak luh Rajath Shrivarathri leh Sunil S te hmang tawn hle mah se awmzia an nei thei lo. Set thumna atangin tanhmun an siam rem a, an team thatna an lantir thei.

Harsa lo takin Anastasia-in set hnih an la zawn ve leh a, set nganaah an inchuh hle. Chak zawk ni thei turin Tuichangralin 14-12 in hma an hruai a, vawi khat tidika point thum hmu zawk ni thei turin hun tha vawi hnih an nei zawn.

Mahse, Anastasia-in hun harsaa rin ngam player an nei tam a, an thatpui. PC Lalnunhlua'n vawi hnih vaw tla zawnin 14-14 a ni a, an deuce. Boruak sangah Tuichangral an paukhauh zo lo va, setter Hmangaihthanga che sualin Jaideep chuan a vaw sual zui bawk.

Point li an hmuh zawn hnuin Anastasia an chak a, an inkhelh chhungin Rajath chuan point 17 hmuin point li a paih a, Sunil S chuan point sarih hlawhin point nga a paih ve thung. Mizo player-te an intluk tlang a, Lalnunfela'n point sarih hmuin vawi khat chiah tihsual a nei a, a tawpa che tha Hlua'n vawi ruk vaw tlain tum hnih a tisual.

Tuichangral tan captain Malsawmsanga'n point riat hmuin point hnih a paih a, Hmunmawia'n point sarih thawk chhuakin point khat a hloh ve thung. Vawi hnih an khelhah tlawm ve vein point hnih an hmu tawh a, kar leh nilainiah TNT nen an inkhel leh dawn.

Khelh hnihah Anastasia-in point nga hmuin dinhmun beiseiawmah an inhlangkai. Inrinniah league hmahruaitu ni mek Chhinga Veng Spikers an bitum dawn a, an nihna dik tak a chiang leh zual ang.

Junior league-ah Anastasia Under 18 team-in set li laiin Tuichangral lakah 15-8, 15-4, 15-11, 12-15, 15-9 in an chak a, vawi hnih an khelh tawhah an chak ve ve a ni.

TABLE

1. Chhinga Veng Spikers - play 2, point 9

2. Durtlang North - play 2, point 8

3. Anastasia Electric Veng - play 2, point 5

4. Thutak Nunpuitu Team - play 2, point 3

5. Hunthar Veng - play 1, point 3

6. Tuichangral - play 2, point 2

7. Chanmari West - play 1, point 0

April 26, Zirtawpni - 8:00pm

Fixtures

Tuichangral v Durtlang North

April 26, Zirtawpni - 6:00pm

Tuichangral U-18 v Durtlang North U18